Trahadonan Valero cu posibel accion si no regla nan asuntonan

ORANJESTAD - Si gobierno y CITGO y Valero no yega na un areglo cu e trahadonan actual, por spera accion di e trahadonan den e proximo dianan. Den combersacion cu abogado di IOUWA Chris Lejuez, ela splica NoticiaCla.com cu nan ta preocupa cu nan derechonan y asuntonan no ta wordo bon regla. Y prome cu e traspaso di Valero pa CITGO tuma lugar, nan kier regla nan asuntonan. "Te ainda, ni gobierno ni CITGO a sinta cu e representantenan di e trahadonan, pa papia over di nan posicion" Lejuez a cuminsa na bisa. Tin indicacion cu particularmente e trahadonan cu ta encarga cu suministro di gasolin na e pompnan, lo por pone trabou abou cu tur consecuencia cu esaki por tin. 

CLAUSULA CAO

Tin un clausula den e CAO entre IOUWA y Valero cu ta bisa cu si traspasa e compania pa un otro doño, e CAO ta keda na vigor. Pero tin puntonan manera 'profitbonus cu Valero tabata paga trahadonan pa 8 aña caba, cu nan kier pa sigui, pero cu no ta den e CAO. "Asina tin diferente otro punto y condicion cu no a wordo hinca den e CAO, pero cu ta na vigor" Lejuez a bisa. Y ta incertidumbrenan aki ta loke ta preocupa e trahadonan. Basta tempo e trahadonan ta inkieto riba e condicionan aki y con nan lo wordo atendi. "IOUWA durante e periodo cu e negociacion tabata andando, a logra mantene e trahadonan keto pa no stroba e negociacion" Lejuez a sigui bisa. Pero awor cu esaki a caba, ainda no a papia cu e trahadonan y un biaha mas e trahadonan ta birando inkieto. "Y IOUWA no sa si e por mantene e trahadonan trankil atrobe. Esey ta nan precupacion. Como tal mi a manda un carta na nomber di IOUWA pa CITGO y gobierno, unda cu mi ta atende nan riba e asunto aki unda cu mi ta urgi gobierno pa atende e asunto aki prome cu e traspaso tuma lugar". Lejuez no por a duna un cifra exacto di e trahadonan, pero cu ta trata basicamente di tur trahado na Valero. 

ACCION POR AFECTA GASOLINE

E abogado a confirma cu e grupo di trahado cu ta encarga cu e suministracion di gasolin na e pompnan di gasolin na Aruba tambe ta forma parti di e trahadonan preocupa. "E carta aki ta (valido) pa nan tambe" Lejuez a bisa. Y ta for di e grupo aki principalmente tin e preocupacion, manera cu NoticiaCla.com por a compronde, cu tin chens di un accion cu por afecta suministro di e.o. gasolin na Aruba. "E grupo aki tambe tin gana grandi di bay den accion" Lejuez a confirma na NoticiaCla.com. "Nan interes no a wordo debidamente atendi cu CITGO y gobierno y Valero tampoco", e abogado a sigui bisa. 

NO TIN ULTIMATUM

Lejuez no kier papia di un ultimatum pa e carta, pero tin un fecha cu ta wordo menciona riba cual e traspaso lo mester tuma lugar. A tende cu e fecha aki lo mester ta dia 24 di september, y pues e combersacionan y areglo mester tuma lugar pues prome cu e fecha aki. "No tin ultimatum, pero tempo ta mustra cu no tin hopi tempo mas pa reacciona" Lejuez a bisa. P'esey a urgi gobierno y CITGO pa atende e asunto aki hopi lihe pa elimina e inquietud cu ta reina y cu por desemboca den un accion mas pisa.