Oposicion cu ultimatum pa de Meza riba documentonan CITGO

ORANJESTAD - Tres lider di fraccion a manda un carta final pa minister di Economia Mike de Meza cu un ultimatum pa diahuebs mas tarda contesta -un biaha mas-, si ta cambia di opinion con tin cu maneha e asunto di documento di CITGO. Parlamentario Andin Bikker den un carta manda diaranson atardi, a contesta e carta di de Meza, cu ta papia cu no por entrega e documentonan manera cu e fraccionan a pidi. Bikker, papiando na nomber di oposicion, ta mustra cu no tin indicacion cu tin algo di secrecia y como tal e 'modus operandi' di gobierno no ta cuadra.

CARTA

Den e carta, Bikker ta mustra pues cu un analisis preliminar no ta indica cu tin documentonan cu ta motibo pa tin secrecia di e companianan respectivo. "Nos ta di pensamento pues cu gobierno no por sigui para ariba cu e documentonan referente no por wordo entrega', Bikker ta sigui bisa. "Mi ta warda un contesta mas lihe posibel riba e pregunta ripiti aki" Bikker a bisa. Riba peticion di NoticiaCla.com si tin un 'ultimatum' pa e contesta aki drenta, e parlamentario a contesta "Pa mayan den dia mester tin contesta ya cu mayan atardi ta entrega pregunta por escrito". 

RENE HERDE

Mientrastanto lider di fraccion di AVP Rene Herde a duna su comentario tambe riba e caso aki pa medio di un comunicado. E esencia di su comentario ta basa riba e hecho cu e (y su fraccion) no tin ningun problema cu e 'reglanan' cu gobierno a pone pa mira e documentonan. "Tur miembro di parlamento mester haya tur informacion y e mester por lesa tur documento pa e por tuma un desicion responsabel riba tur tema. Esey ta e principio basico cu semper mester conta. Tur miembro di Parlamento mester ta bon informa. Pero esey no kiermen cu e mester por bay cas cu e documentonan of cu e mester por saca copia di e documentonan." Asina Rene Herde', lider di e fraccion di AVP a splica e procedura cu a uza pa pone tur informacion tocante di e ley y e contractnan entre gobierno di Aruba, Valero y CITGO disponibel pa miembronan di Parlamento, pero sin cu nan por saca copia of bay cas cu e documentonan. (Lesa su comunicado completo aki). 

PRESIDENTE DI PARLAMENTO

Presidente di Parlamento Mervin Wyatt Ras tambe a reacciona y a cuestiona e forma di proceder di oposicion, unda cu segun Wyatt Ras, ta tilda su persona di ta sucumbi pa presion di gobierno. "Den historia no ta asina cu parlamentarionan ta haya stukken ter inzage di antemano. Kico oposicon kier anto? Lastra un presidente di Parlamento recien nombra di estado aki no ta na su lugar. Wyatt-Ras ta haciendo su trabou di ofrece informacion pa un debido preparacion" e presidente ta bisa. 

Segun Wyattt, banda di esey tur parlamentario na diferente ocasion a haya informacion tocante e procesonan di deliberacion cu CITGO dor di e comision y tambe hunto cu e minister concerni. Wyatt-Ras ta haya incorrecto cu ta recurri na politikeria pa por lastra su persona riba medionan di comunicacionnan y facebook." Ta keda cu e refineria lo pone pan ariba mesa di hopi famia y cu henter pueblo ta ansioso pa pasa e ley pa por yega na reapertura" e ta sigui bisa. Lesa su comunicado completo aki.