Guera di ‘servicio acuatico’ ta core cu turistanan

ORANJESTAD – E guera di ‘servicio acuatico’ riba beach ta core cu huespednan di hotel. Como tal e siman entrante e grupo di hotelnan cu ta confrontando problema di droga y otro problema riba nan beach, lo reuni hunto pa dicidi nan proximo plan di accion. “Nos a informa cu e ta un problema serio” e gerente general di Radisson Hotel, Mark Lyttleton Frances a confirma na Noticiacla.com . E problema, manera cu e la keda presenta caba, ta incumplimento di licencia acuatico.

Como ehempel, Lyttleton ta mustra cu proveedor di servicio acuatico A, ta 30 pia lew di proveedor B. Entre nan dos tin un problema pasobra nan no ta ‘gusta otro’. Proveedor A no tin licencia mes pa duna servicio pa e.o. huur parasol, y e otro tin licencia pa huur 15 parasol. E cantidad di parasol rapidamente ta aumenta di 30 te na 50 parasol, siendo cu e permiso ta pa solamente 15. E ta un actuacion logico pasobra e cantidad di pasahero crucero ta aumenta y e ta un forma rapido di gana placa.

Como cu proveedor A ta considera e acto di esun B como no husto, e tambe ta (riba su mes y sin permiso) cuminsa huur parasol. Den un rato di ora tin centenares di parasol pa huur riba beach. Y ora cu no tin mas lugar pa huur, e turistanan ta wordo bisa pa ‘djis uza un palapa’. Palapa cu ta propiedad di hotel. “Pa e turista haci su necesidadnan, ta avisa nan pa ‘djis haci ‘e den laman” e gerente ta bisa. Hunto cu esey tin e benta di marihuana manera cu ta algo masha normal.

Hotelnan ta perdiendo miles di dollar cu e problema aki, pasobra mester purba reembolsa e turistanan cu sea placa cash of descuento ora di e proximo bishita. “95% di biaha e ta costa nos un ‘estadia di un anochi pornada’ of dos. Esey so caba ta $ 1.800,= pa famia” e gerente ta sigui bisa. Su problema ta cu e no sa cuanto placa por perde pa motibo di negoshi di futuro. “Cuanto di nan enberdad no ta bolbe mas pa motibo di e p problema aki, y si esey ta bal 100.000 dollar of mas di negoshi”?. E problema tambe ta cu e presencia di social media, turistanan no ta keda keto y ta publica potret y manda mensahe riba e rednan social, website nan manera trip advisor. Como tal nan ta haya nan mes ta contesta miles di pregunta di posibel huesped cu ta precupa cu e situacion di e beach. “Nos no ta sigur cu nos kier boek” ta loke cu e turistanan ta bisa e gerente.

E problema di droga (manera cu Noticiacla.com a relata caba) ta creciendo. Esaki pasobra e castigo mereci, of castigo husto ta zero segun e gerente. “Bo ta wordo sera den un cel pa un anochi, haya un cuminda gratis y un cama y e siguiente dia bo ta bek” e gerente a bisa, mustrando su frustracion pa cu e situacion. E gerente ta spera cu otro siman nan por tin un plan mas solido pa actua y presenta sea na gobierno, of actua riba nan mes, pa soluciona e problema creciente aki.