ABC a perde caso contra Azure Condominium

ORANJESTAD - Aruba Birdlife Conservation (ABC) a perde e caso contra e desaroyadornan di e proyecto Azure Condominiums, PGM Condobuilders NV. Den un sentencia di 12 pagina, Corte a dicta fayo den direccion di ABC, basando su mes grandemente riba e hecho cu ABC a tarda pa protesta contra e proyecto aki y como tal no por bin actua awor. Ademas, un eventual paro na e proyecto lo por tin embergadura mas serio pa PGM (posibel bancarota y un ruina riba un tereno) cu ABC. Como tal a rechasa e peticion di ABC pa para e construccion di e proyecto y pa remove e grua grandi di e sitio. 

ARGUMENTACION

Den liña  grandi, hues a mustra riba e hecho cu ABC no a actua ora cu e mester a actua, cu ta for di 2014 ora cu a reuni cu e desaroyadornan. ABC tabata na altura for di fin di augustus 2014 y a opta pa no protesta of entrega un obhecion oficial contra e proyecto aki e tempo ey. Ademas, hues ta argumenta, ABC mester por a compronde y conclui cu PGM lo tabatin intencion di desaroya un proyecto grandi y inverti placa den e proyecto. Ademas segun hues, ABC e tempo ey, of no tabata na altura of no a mustra cu nan tabata sa cu e area en cuestion, segun e Ruimtelijk Ontwikkelings Plan (ROP) lo tabata un tereno berde. Tambe ABC lo no a realisa of sa e tempo ey cu un construccion eynan lo a haci daño na e flora y fauna di e area. Den un forma hopi descriptivo, hues a referi na e.o. e hecho cu pa 5 luna largo, uzando por lo menos 39 truck a basha 500 m3 di beton riba un area grandi, y cu no obstante tur e accion aki, ABC a scoge pa no entrega un obhecion contra e proyecto, sino despues cu PGM a inverti miyones  den e proyecto. "ABC a ranca e bel mucho laat", e hues a dicta. Y como tal, a rechasa e peticion di ABC den e caso aki y a ordena e partido perdedor pa cubri e gastonan di e corte. Por lesa e veredicto aki.