Ministerio Publico no ta pone casonan den doofpot

ORANJESTAD - Si hende tin e percepcion cu ministerio publico ta drumi, y cu ta pone casonan cu mester investiga, den doofpot, esey ta keda pa nan. "Si esey ta e percepcion cu tin pafo, mi lo ta rabia cu mi mes, pasobra ta keda na ami pa cambia e percepcion ey",  Alexander van Dam, Procurador General nobo di Aruba a contesta pregunta di NoticiaCla.com diamars. "Nos no tin un doofpot. Tur denuncia cu drenta, nos ta atende". El a sigura cu e ta haci su trabou independiente, como magistrado y no ta liga na ningun partido of persona.  "E unico dos damanan cu mi tin cu responsabilisa mi mes, ta na mi casa y dama husticia" 

CASO 

"Cualkier caso cu nan ricibi na ministerio publico, di cua indole cu tin un sospecho aden, nos lo investiga" van Dam a confirma na e portal aki. "Mi por dunabo e promesa cu nos ta haci esey. Cu ami ta haci esey, cu nos ta haci esey. Pero loke ta pasa hopi tambe si ta cu tin hopi hearsay (tende y bisa)" van Dam a bisa. Pues cu no tur caso di sospecho por investiga. "Si tin sospecho, por haci un investigacion. Pero mi no ta bay core si un hende bisami cu mester persigui tal hende pasobra e no ta sirbi. Mi no por haci esey pasobra nos ta mucho chikito pa esey". E ta mustra tambe cu tin hopi denuncia cu no ta conduci na nada, y esey tin cu wordo splica tambe. Mes momento e ta admiti cu tin cu duna mas informacion na comunidad, pa por evita percepcion cu ministerio publico no ta haciendo su trabou manera cu mester.