Candela riba dump a hala atencion

ORANJESTAD - Cantidad di huma visibel di hopi parti for di Aruba, un rato a causa consternacion pa varios habitante diasabra merdia na Aruba. Rapidamente a constata cu tabata trata di un huma procedente di Parkietenbos, na e area di dump. A bin constata cu un cantidad di tire tabata na candela, y tabata responsabel pa e huma diki cu tabata cubri un parti grandi di e area suit di Aruba. Mirando e area tabata serca di Oranjestad, esaki a hala atencion mesora. Bomberonan a haci nan intento pa paga e candela na dump, y e huma a bira menos, pero ainda visible. NoticiaCla.com a compronde cu e huma a stroba un regata cu tabata tumando lugar e momento ey.  

For di tempo cu gobierno anterior a bin cu un proyecto di para e candela na dump, varios biaha toch candela a logra 'sende' riba e dump. Sea intencionalmente of pa via di e propio combinacion di naturalesa y artefactonan flamabel. Foto cortesia Aldrich Croes.