Randolph Anthony Ruiz nombra como CFO di WEB Aruba N.V.

ORANJESTAD - Randolph Anthony Ruiz a keda oficialmente nombra como “Chief Financial Officer” (CFO) di WEB Aruba N.V. y lo drenta den servicio entrante prome di october 2016, asina Utilities Aruba N.V. a confirma. E nombramento aki ta resultado di un proceso di solicitud instrui pa Utilities Aruba N.V., cual e compania PricewaterhouseCoopers a dirigi desde comienso di aña.

Randolph Ruiz (CFO) conhuntamente cu Luis Oduber (CEO - COO) lo encabesa e gerencia di WEB Aruba N.V. E tarea principal como CFO ta encera duna guia na sectornan manera “Financieel en Economische Zaken” (FEZ), “Water Distributie en Customer Service” (WD&CS) y e departamentonan di “Enterprise Risk Management” (ERM), “ICT” como tambe Secretariado di Gerencia.

Randolph Ruiz (48) a obtene su “Masters” den Accounting na aña 1996 na St. Thomas University na Miami. E tin amplio experiencia den mundo financiero y a traha den diferente sector, entre otro como “Senior Audit Manager” na Ernst & Young Aruba y “Financial Director” na Tierra Del Sol. 

Utilities Aruba N.V. conhuntamente cu WEB Aruba N.V. ta felicita y ta desea Randolph Ruiz tur clase di exito cu su carera nobo hunto cu Luis Oduber como gerencia.