CITGO kier 100 miyon dollar di PDVSA pa 'rebiba' refineria na Aruba

HOUSTON - Citgo Petroleum a pidi su compania madre PDVSA pa 100 miyon dollar pa cuminsa cu e inversion den e refineria na Aruba. Asina e agencia di noticia REUTERS ta raporta den un raportahe exclusivo. E intencion ta pa inverti 685 miyon dollar pa renoba y rebiba e refineria di Aruba. Y ta aki, documentonan interno di CITGO cu a cay den man di REUTERS ta revela e informacion aki. E compania, segun REUTERS, a ricibi aprobacion di gobierno  di Aruba pa renoba, restart y opera e refineria. Sinembargo e aprobacion no a wordo duna ainda pa Parlamento di Aruba. 

E  importancia di Aruba como un facilidad pa wordo uza pa PDVSA y su subsidiario a aumenta e ultimo simannan ya cu e compania madre a wordo saca for di Corsou, unda cu e ta operando e refineria di 335.000 bari pa dia, un facilidad di almacenahe y un otro terminal.

CITGO, segun e raportahe ta sigui bisa, tabatin intencion di cuminsa e proyecto na augustus pero debi na 'desacuerdonan di ultimo ora entre gobierno y Valero', a sufri un retraso. Falta di fondo tambe a contribui na e retraso segun REUTERS. PDVSA e aña aki a enfoca den paga su debe internacional, y ainda su compania principal PDV Holding no a transferi e 100 miyon di prestamo na CITGO, segun fuentenan. Mientrastanto, CITGO ta purbando pa genera fondo priva pa cuminsa e operacion na Aruba. "Nos ta buscando pa financiamento di proyecto di construccion di cualkier entidad financiero, un institucion finaciero grandi, e documento skirbi na augustus ta bisa. Ni CITGO, ni gobierno di Aruba kier a comenta segun REUTERS. 

E unidad di refina di CITGO ARUBA ta premira cu e lo ricibi destahonan pa e proyecto di restauracion. E prome di dos unidad di crudo lo por cuminsa opera mitar di 2017. Henter e proyecto lo mester ta cla mitar di 2018, unda cu e lo mester comberti e unidad di destilacion crudo den upgrader crudo, cu capacidad di comberti 209,000 bari pa dia di crudo Venezolano den 90 mil bari pa dia. CITGO ta premira pa firma un contrato nobo cu PDVSA pa saca petrolio na e hafnan Venezolano. E compania ta premira cu e refineria na Aruba lo por genera un cashflow di 220 miyon dollar pa aña. 

Un di e desacuerdonan tambe, tabata relaciona cu e terminal. "Aruba tabata kier ta sigur di a ricibi suficiente producto refina di e refineria". Mientrastanto tin 6 consorcio di contratista priva interesa den e rehabilitacion di e compania. Nan ta Vepica, Tecnoconsult, Tivenca, Den Spie y Inelectra, Pentech, Technip (TECF.PA) y  JGC Corporation.