Gobierno a stop carta di garantia cu ta pa solamente consumo local

ORANJESTAD - For di dialuna a bira conoci (publicamente) cu gobierno no ta duna carta di garantia mas pa consumo local. No a specifica si con lo atende cu carta di garantia pa esnan cu no mester di visa. NoticiaCla.com a compronde mientrastanto cu IASA tin un proposicion riba mesa pa nan mes haci esaki. A compronde tambe cu DIMAS no tabata uzando e carta legalisa pa DWJZ di garantia ya pa algun tempo. Y na DIMAS ta laga e garante personalmente bin y firma e borgstelling ora di kier aplica y pidi pa un extension di estadia turistico pa keda na cas (particular). A compronde cu pa esnan cu mester di visa pa drenta Aruba, DWJZ lo sigui - manera semper - apostilla y legalisa e carta di garantia/invitacion/borg.

MINISTER DOWERS

Manera ta conoci, dialuna minister di husticia Arthur Dowers a informa cu esnan cu a invita/y ta para garantia pa un persona stranhero keda na nan cas y resulta cu tin gastonan cu e mester cubri (medico, deportacion, of otro), lo procede pa haci esun cu a para garantia (borg) responsabel pa e gastonan aki.

Esnan cu ta biahando pa Aruba y tin intencion di permanece na cas di un familiar, mester tene na cuenta cu den caso cu e no ta dispone di un carta di garantia/invitacion, cu nan lo mester por comproba na inmigracion ora di entrada cu nan tin suficiente likides pa cubri eventual gastonan durante nan estadia corto como turista na Aruba, esta alomenos un suma di 150 dollar pa cada dia.