Problema cu ATA a pone cu a cambia proceso di usa fondo pa criminalidad

ORANJESTAD - E mandatario di husticia Arthur Dowers no ta na altura di e oferta di colega minister Oduber pa 4 miyon florin di fondo di turismo wordo destina pa husticia. Ademas e mandatario ta mustra cu ta debi cu tabatin problema cu ATA (Aruba Tourism Authority), riba asunto di fondo pa criminalidad, a dicidi di cambia e proceso di ricibi fondo. E mandatario den pasado a yama esaki 'pa evita polemica'. Dialuna e mandatario a refuta na NoticiaCla.com cu el a usa e tema ey. Asina e mandatario di husticia a informa NoticiaCla.com dialuna ultimo. E mandatario a splica cu tin un sistema di cooperaicon cu fondonan a wordo deriva den pasado, manera via AHSF cu a lanta hopi aña pasa via e gremio hotelero AHATA. E ta wordo usa pa paga e.o. security guard vigila area di hotel. Algo cu no a resulta. 

Segun Dowers, a cambia e concepto ey tempo cu el a bira minister. A palabra cu ta revoca e parti ey, esta e concepto di paga pa security guard. E fondo lo a bay e ora pa polis. E fondo tabata un tempo 1 miyon y a bira 700 mil. E prome dos aña cos a bay bon, pero cos a daña na caminda ora cu e fondonan mester a bin via ATA. Na momento ey a bin problema segun e mandatario, pasobra ATA tabata exigi pa haya plan di cuerpo policial pa nan mira kico polis lo a bay haci cu e placa. Algo cu no por segun e mandatario. "E no ta aceptabel cu ATA ta pidi un plan pasobra ATA no tin relacion cu cuerpo policial. ATA a keda di pone placa den e AHSF y e fundacion ey tabata deal cu polis" Dowers a bisa. Ora cu ATA a cuminsa exigi, a mustra cu esey no tabata por, pasobra tabata bira secreto. 

Despues a dicidi cu ta usa e placa pa cumpra material pa combati criminalidad, y e informacion ey no ta un problema pa e.o. ATA haya sa kico e plan ey ta. Pero e mandatario a bisa tambe cu si ta bin asina hopi presion pa exigi y no ta stort placa na ora, a bisa cu no ta bay traha na e forma ey mas y si ATA kier contribui, mester deposita e cen den e criminaliteits fonds y for di eynan ta usa e placa pa combati criminalidad. 

OFERTA DI MINISTER

E minister no ta compronde e oferta di 4 miyon, pasobra segun e mandatario, no ta bin ningun cen di ATA mas pa gobierno. "Mi ta kere cu tin cu puntra esun cu a bisele" Dowers a bisa, refiriendo na colega minister Oduber. "Segun mi a compronde bon, e cen ey ta cen di gobierno, no di ATA. Anto e cen di gobierno ta Staten ta dicidi unda e cen ey ta bay y ningun di nos como minister no ta hacie" Dowers a bisa finalmente.