Dowers: Por lo menos un persona sa kende a comete e crimen Wayaca

ORANJESTAD - Por lo menos un persona sa kende a comete e crimen na Wayaca. Esaki segun minister di husticia Arthur Dowers. E mandatario dialuna mainta a elabora riba e atraco cu a tuma luga siman pasa na Wayaca unda cu a kita bida di un señora. E mandatario a splica cu Ministerio Publico y Cuerpo Policial ta trahando riba e caso dia y anochi y ta pendiente di tipnan valioso for di comunidad. El a tuma nota cu Ministerio Publico a saca informacion cu un imagen den prensa y cu a pone e suma di Afl. 5000 disponibel pa esun cu duna e tip cu ta conduci na logra identifica y consecuentemente detencion di e sospechoso(nan).

E mandatario a expresa cu tin por lo menos un persona mas cu sa kende a comete e crimen, como cu esun cu a tira e señora mata y a herida e casa, a ricibi yudansa di por lo menos un persona mas, esta e chauffeur di e auto cu nan a scapa den dje. Ainda no ta conoci cua ta e di dos auto cu nan a uza pa huy den dje, pero autoridadnan ta haciendo tur cos posibel pa yega na e malhechornan. E team investigativo ta trahando hopi duro.

Dowers ta encurasha tur persona cu por tin cualkier idea di kende por a comete e crimen aki, pa haci caso di e peticion pa tipnan, y tuma contacto cu autoridadnan. Comunica cu polis, e 5000 florin ta disponibel, ela agrega. E titular di husticia a splica cu e tip valioso ta esun cu ta yuda identifica e persona(nan) envolvi den e crimen. A yega di sosode por ehempel cu e persona cu a duna un bon tip a simplemente identifica e paña y/of pechi di e criminal como un obheto cu a wordo adkiri den su tienda.

Un remarca cu a scucha den comunidad ta cu e recompensa di 5000 florin ta tiki y pues no un bon incentiva pa hende risca nan bida pa duna cualkier tip. E Minister a splica cu e suma ta wordo determina y basa riba e tipo di crimen y den esaki ta tene cuenta cu situacionnan similar internacional y kico ta wordo ofreci den exterior. El a añadi cu e mes ta haya e suma “basta bon placa”.

Dowers a subraya cu e persona cu duna e tip y ricibi e suma aki no ta ni conoci p’e, como cu e placa aki ta un “geheime uitgave” cu ta sali for di un “post” special den e presupuesto di husticia. E mandatario ta pone un suma disponibel, y ora tin cu agrega mas placa e ta wordo avisa, pero nunca e ta haya sa ta kende a cobra e recompensa. E persona cu duna e tip valioso y pues cobra e recompensa no ta core peliger, como cu e ta duna e informacion na un persona cu ta di confiansa y ta mantene tur informacion personal confidencial. E placa ta sali di un comision y ta keda un “geheime uitgave”, cual ningun hende por haya sa. 

Tur persona por tin e confiansa cu di parti di autoridadnan tur su informacion ta keda secreto; y e no ta core absolutamente ningun risico, ela bisa. Minister Dowers a bisa cu ta masha importante pa e persona cu duna e tip no conta ningun hende despues cu ta e a duna e “tip di oro” y a cobra e recompensa, como cu asina si e por atrae situacionnan indesea pa su mes. Finalisando e Minister a laga sa cu den practica no ta importa cuanto e suma di recompensa ta, pasobra hopi biaha sin cu publica un recompensa mes polisnan ta haya informacion y tambe tin casonan unda cu e persona cu a duna e tip hasta ta nenga e recompensa.