Quota Club a tene apertura di 'Shatter Silence Week'

ORANJESTAD - Quota a tene apertura di 'Shatter Silence Week'  dialuna na Oduber & Kan den presencia di minister di Salud Alex Schwengle. Presidente Gwendolyn Rojer a informa tambe cu a cuminsa e Siman di Kibra Silencio cu un tremendo Fun Walk diadomingo mainta tempran, y tur den e aspecto di nos campaña pa concientisa nos Aruba di “Cuida Bo Oido”.

Cuerpo di Bombero di Aruba tabata presente pa haci test di zonido tambe. Nan tin cu enfrenta yen di ocasion ta wordo expone y confronta cu zonidonan exceso na nan oido, mientras cu nan ta laborando y tin cumpli cu nan obligacion y tareanan. A  presenta e Quota banner nobo “Cuida Bo Oido” na communidad, cu ta illustra cu ta for di chikito nos tin cu cuida nos oido.

Segun Rojer, perdida di oido ta bay sin cu nos mes ta ripara y locual cu a bay perdi no por wordo recupera. E unico ayudo lo ta un aparato auditivo y no ta asina facil pa adapta na e uzo di un aparato asina tampoco. Den algun caso un implante cochlear ta e solucion, pero no ta tur patient ta bin na remarca pa esaki. Y pakico depende ariba un aparato si bo por evita esaki door di cuida y evita sonido cu ta causa daño na bo oido. Personanan cu no por scucha bon hopi biaha ta isola nan mes pasobra nan no por sigui un combersacion, vooral den grupo. Hobennan, fuera di isola nan mes, ta haña problema cu nan estudio y ta expresa nan frustracion, cu mal comportacion .

Quota ta preocupa vooral, pa nos hobennan, pasobra mayoria no ta consciente cu sonido mucho duro pa tempo largo ta haci daño y hopi di nos hobennan ta gusta scucha musica demasiado duro sin realisa kico esey kiermen pa ora nan ta mas grandi. 

No ta por nada nos a trece nos hobennan den e campaña aki, pasobra ta di chikito ta cuminsa cu e conscientisacion aki pa mayan ora bo ta grandi bo tin bo oido. Nos por mira na nos Banner nobo, cu nos ta propaganda Cuido Di Oido pa tur generacion.

P'esey nos ta encurasha hobennan pa bin haci un test pa haña sa con nan oido ta. Nos tawata tin e honor di por a scucha un hoben comparti su storia, su testimonio ariba su oido y tambe kico e a haci falta ora cu e no por a scucha bon, y cu despues di su operacion si esey tawata posibel, e alegria, su auto estima, su motivacion pa sigi bay dilanti y comparti su storia pa asina tur hoben tuma nan oido na serio.

E siman aki Quota lo percura pa tur hende tin opportunidad pa controla nan oido y haya resultado mes un momento completamente gratis. Cada aña atrobe, e oportunidad ta wordo brinda na nos comunidad pa haci e test di oido, pero tambe pa cuida bo oido. Encuanto e resultado di e testan di Oido, evaluacion lo wordo haci, na final di e siman aki,  di e test nan haci pa Quota por tin un record di con e oido en generaal ta den nos comunidad. Cual evaluacion lo wordo duna despues. Please yama pa bo cita y test bo Oido Gratis pa cortesia di Quota International of Aruba.

Test nan ta wordo duna gratis, durante e siman aki, cu cooperacion di Oduber & Kan, Aruba Hearing Institute y SVB San Nicolaas, bel y haci bo afspraak pa bo no keda afor.

Yama pa bo cita di Test di Oido Gratis na e siguiente localidadnan: Oduber & Kan, Cayenna Mall:  5824719, Aruba Hearing Institute, Eagle: 5878885, SVB, San Nicolaas: 5272732.