Lo cobra tur “Garantsteller” di esunnan cu keda Aruba mas tempo cu ta permiti

ORANJESTAD - Si acaso detene un persona cu a keda Aruba mas largo cu su estadia oficial y legal ta permiti y e persona aki no paga su mesun gastonan pa sali for di Aruba, e persona local cu a para “garantia” p’e lo ricibi un cobransa for di Gobierno pa e gastonan envolvi. Dialuna mainta durante di e conferencia di prensa semanal di gobierno, minister di Husticia,  Arthur Dowers a declara cu esaki ta e condicion stipula riba e formulario di garantia cu e “garantsteller” ta firma y for di dialuna pa dilanti Gobierno ta bay aplica e condicion aki di e garantia.

Ademas, si un persona di exterior haya su mes den un situacion cu ta rekeri cuido medico, esaki lo wordo cobra na “garantsteller” tambe. Minister Arthur Dowers a bisa cu e “garantsteller” ta scapa di e gastonan aki si e persona di exterior mes cubri su gastonan. E mandatario ta apela na personanan local cu a para garantia pa personanan di exterior cu ainda por ta na Aruba, aunke nan periodo di estadia legal a vence, pa busca e persona cu nan a para garantia p’e y pidi’e pa e bandona e isla.

Si un persona bira malo, su gastonan medico por core for di algun cien florin te 10 mil florin y hasta surpasando 100 mil florin, Minister Dowers a agrega. E persona local cu a para garantia pa e persona di exterior a firma e formulario di garantia cu ta bisa cu e ta responsabel pa e gastonan aki.

Den e simannan cu a pasa tabatin discusionnan amplio tocante di personanan cu ta bin di Latino America y ta keda nos pais, Minister Dowers a bisa, nan ta keda Aruba sin permiso y ta sea traha ilegal y tuma pues cupo di trabou di otro hende cu si ta local of ta legalmente na Aruba cu permiso di trabou y tin un grupo chikito cu ta keda sin traha, pero ta scoge pa ocupa nan mes cu actividadnan criminal.

El a comenta cu tabatin problema cu a presenta unda cu lamentablemente hasta un persona a fayece, siendo ilegal na Aruba. Sa pasa cu personanan ilegalmente na Aruba no tabatin cobertura di seguro medico y probablemente como cu nan no tin e medionan financiero ni e seguro pa busca tratamento, nan ta bira malo, nan no ta bay dokter na tempo y ora nan yega ta demasiado laat. E persona cu a para garantia pa e persona ilegal ta haya su mes responsabel pa cubri e gastonan di e persona cu a fayece.

Dowers ta spierta e personanan local cu ta sostene estadia ilegal na Aruba, cu nan a firma un “garantieverklaring” y pa nan yuda combati ilegalidad y spaar nan mes gastonan y duele innecesario.