OM: Victima Wayaca a fayece a consecuencia di un tiro

ORANJESTAD - E dama Shasha Fong  a fayece un siman pasa den su cas na Wayaca, a consecuencia di un tiro. Vocero di ministerio publico Ann Angela a confirma cu e patologo cu a conduci e autopsia dialuna riba e curpa di e victima a determina cu 'a constata cu e señora a fayece a consecuencia di e tiro. Tabatin un herida di bala cu a hiba na fin di su bida" Angela a sigui bisa. Mientratanto e curpa a wordo duna liber na famia. Ora cu a puntra e vocero ki tipo di bala e persona a haya, e contesta tabata ' un balazo', osea un 'schotwond'. Mas e vocero no por a duna. 

BUSCANDO E SOSPECHOSO

Mientrastanto polis ta sigui en busca di un persona cu por ta relaciona cu e caso di asesinato na Wayaca siman pasa. For di polis NoticiaCla.com a ricibi un comunicado bisando cu 'en cuadro di investigacion di e incidente cu a tuma luga diamars 13 di september 2016 caminda un persona a perde su bida y otro a wordo herida pa medio di disparonan di arma di candela, na momento cu un desconocido a drenta nan cas den Wayaca, kier a pidi bosonan coperacion pa lo siguiente'. 

Segun e comunicado, e team cu ta investiga e caso a haci un asina yama "buurtonderzoek" y a analisa entre otro diferente imagennan di camaranan di seguridad. Riba un di e imagenan cu a logra haya,  ta aparece un persona cu ta di suma importancia y interes pa e team investigativo.  E persona aki  ta aparece ariba e video adhunto cu e comunicado di prensa aki. Ta urgi cualkier persona cu por indentifica of sa ken e persona aki ta, pa por fabor tuma contacto inmediatamente cu nos team na 5975147 of e tiplijn di polis 11141. "Bo informacion lo por ta sumamente valioso. Danki pa e cooperacion" e comunicado ta finalisa bisando. Esaki ta e video cu polis ta referi na dje.