OM: Lo persigui dos polis pa morto di Mitch Henriquez

DEN HAAG - Ta bay persigui dos di e 5 agentenan policial Hulandes envolvi den morto Arubiano Mitch Henriquez, penalmente. Asina ministerio publico na Hulanda a anuncia dialuna mainta. Ta sospecha e dos agentenan di maltrato cu consecuencia fatal. Tambe ta culpa nan di homicidio. Segun ministerio publico, e agentenan no tabatin intencion di mata Henriquez, pero si a uza demasiado violencia. Un di nan a aplica un asina yama 'nekklem' (gara e garganta tene) y e otro a dal Henriquez riba su nanishi y a uza pepperspray. E Arubiano di 42 aña di edad a fayece a consecuencia di stikmento. 

JOKE

Henriquez aña pasa durante un festival na Hulanda lo a grita cu e tin un arma cu ne. Segun ministerio publico, e detencion di Henriquez tabata hustifica pasobra ela stroba orden publico. Pero e no a forma un menasa asina grandi cu violencia fuerte tabata necesario. Ministerio publico ta opina cu e agentenan mester a trata di otro forma pa controla Henriquez. E tres agentenan cu no ta wordo persigui, no a uza violencia cu por a causa e morto di Henriquez. Tampoco nan a yuda nan coleganan concientemente pa nan si por a uza violencia. Ministerio publico a conclui anteriormente caba cu Henriquez a fayece a consecuencia di violencia policial. E no a bebe di mas ni tampoco a uza droga. Su morto a causa protestanan y disturbio den e pueblo di Schilderswijk na Den Haag. Varios dia di disturbio a persigui e ciudad. fuente: N.O.S.