Lidernan na KIA ta cla y dispuesto pa haci cambionan significante

ORANJESTAD - Diabierna a tuma luga un tayer organisa segun e opleidingsplan crea na KIA bou maneho di e director nobo. A trece hopi informacion; tin hopi cos tumando luga na e forma robes cu a crea un identidad den e institucion y uzando e base di loke a presenta den e tayer mester haci un cambio di cultura cu lo resulta den mehoracion y cambionan necesario, segun Ryan Kannegieter, kende ta “ploegcommandant” den KIA ta splica.

Un di mensahenan principal, segun Kannegieter, ta e forma di traha cu lo conoce cambio. E ta algo cu tur hende lo mester custumbra cu ne pa medio di practica, pues cu no tur cos ta bin di “top to bottom”, pero cu e “bottom” tambe tin informacion cu mester yega na e “top” y mester siña con pa comunica y conecta e informacion den e dos direccionnan. 

Ela splica cu den su caso, e ploegcommandantnan ta e “middleman” pa e informacion pasa den tur dos direccion. Nan ta encarga cu delega y pasa informacion di e director pa e trahadonan, pero tambe pa hiba e informacion cu ta bin di e trahadonan bek pa e team di maneho pa cambionan por tuma luga. E informacion comparti den e workshop tabata un “wake up call”, segun Kannegieter, den e sentido cu pa hopi aña a traha segun un cultura cu a wordo pasa di colega pa colega, pero en realidad ta tempo pa adapta na un forma nobo di traha y comunica.

Ingrid James, kende ta un “Opzichter Eerste Klasse” a bisa cu loke mas a resalta ta e topiconan respet, union y cooperacion, cual mester ta na prome luga. El a splica cu como “ploegcommmandant” e informacion comparti den e tayer a yuda dun’e un miho “overzicht” con pa draai cu su team. E opinion di otronan ta conta y asina ta yega leu cu otro tambe, duna respet y bo ta haya respet, el a agrega. E proceso di gana y haya respet ta “vice versa”, y ta valido entre trahadonan, pero tambe pa cu e presonan, segun James, e ta algo genera. Trahando hunto den bon “overleg” cu otro lo logra bay dilanti y pa logra pa tur hende cana e mesun liña ta rekeri pa tin respet, y crea un ambiente unda cu tur hende ta mas uni.

Entre e participantenan di e tayer tabatin e “inrichtingsarts”, dr. Aro Verschuur. Pa cualkier rango mester aplica e principionan di liderazgo cu a keda discuti y cu e tayer ta logra pa esunnan den posicion di liderazgo duna e ehempel pa otronan sigui y ta mehora e trabou cu ta tuma luga den e institucion, ela comenta. E proceso ta cuminsa cu “nos”, el a subraya, mester cuminsa traha mas eficiente y e resultadonan lo cuminsa mustra. El menciona e aspecto di actitud, unda cu e facilitado a papia tocante positivismo y cambio di mentalidad personal pa e bira un custumber y cultura, cu ta resulta den mehoracion, y pa tur hende wak den e mesun direccion.

Verschuur a splica cu den su caso e rol cu tin den KIA ta di un caracter diferente y e no ta distingui entre personanan y rango. Ora e yega trabou e ta atende cu pashent y p’e no tin preso, pero un hende cu ta bin cu un malestar of enfermedad cu e boluntad pa confia den dje pa e yuda e pashent cu su salud. E aspecto di conflicto no ta forma parti di su dia y e ta haya su trabou interesante.