Broeksema: TEDx facilitando con pa contacta otro y haci negoshi

ORANJESTAD – Ademas di comparti ideanan, TEDx Aruba ta facilita, pa medio di su ‘Live Viewing Events’ y App, diferente ‘spin off’. Faltando apenas algun dia pa e di dos edicion di e evento unico na Aruba y den nos region, conexionnan ta floreciendo pa medio di, por ehempel, ‘Live Viewing Events’ y e aplicacion. “No solamente bo por conecta cu esnan sinta den e sala, pero tambe cu tur esnan cu internacionalmente ta sigui TEDx Aruba 2016,” asina Pezij-Broeksema como miembro di e comision organisado a indica.

E aplicacion (App) ta obtenibel na un y tur di manera gratis sea pa Apple of Android. Den dje bo tin e posibilidad pa traha un profil cu ta inclui bo funcion, nomber di compania of organisacion y di e manera aki ta conecta instantaniamente cu tur otro cu tambe ta den e aplicacion, sea na Aruba, of den exterior. Esaki ta conta pa tur esnan cu ta siguiendo e programa di TEDx Aruba 2016 diabierna awo pa medio di un ‘Live Viewing Event’.

Un di e ‘Live Viewing Events’ aki ta na e Embahada Hulandes na Bogota. Nan a extende un invitacion na nan netwerk y ta colaborando cu e universidad priva EAN, Camara di Comercio, ademas di oficina di ATA na Colombia. Nan ta spera un cantidad di 200 persona asisti pa wak TEDx Aruba 2016. “Pa nos esey ta algo sumamente extraordinario; bibo y directo nan ta wak kico ta pasa den Cas di Cultura,” asina e gerente di mercadeo y relacionnan publico ta expresa.

Fundacion TEDx Aruba tambe tin confirmacion caba di British Virgin Island, e isla di Santa Helena den oceano Atlantico, cual mescos cu Corsou, Boneiro y Paramaribo, ta organisando eventonan hunto cu nan respectivo Camara di Comercio. Na Europa tambe tin dos ‘Live Viewing Event’ grandi, e prome ta na Arubahuis na Den Haag y e otro ta na e Europese Commissie na Brussels.

Pa mas informacion tocante TEDx Aruba 2016, su programa pa dia 23 awo cu 10 orador local e internacional, serie di workshop, Live Viewing Events, apps y hopi mas, bishita e website: www.tedxaruba.com. Tema principal di TEDx Aruba 2016 ta ‘What If…? Two words, endless possibilities.’