KPA: No confia mensahe of alerta falso riba Facebook of den chat

ORANJESTAD - "Ta notando un aumento drastico y casi diariamente di hendenan cu un meta dudoso mandando alerta pa purba causa panico of miedo innecesario den comunidad", asina Lito Lacle, Vocero di Cuerpo Policial Aruba a duna di conoce. "Nos mes tin nos sistemanan oficial pa manda alerta of mensahe, ora esaki ta necesario y ora nos mester di comunidad pa ricibi informacion pa solucion di un caso criminal".

Cu esey den mente y pa evita cu otro hende ta keda manda alerta pa cuidou pa secuestro di yiu, of pa tene cuidou ora di lanta placa na ATM, of ora di cana of core riba park, tur eseynan ta mensahenan no oficial y cu no tin keho entrega na Polis. Tampoco e tendencia di autonan ta para bo pa atraco bo, nada di esey no tin keho entrega.

Cuerpo Policial Aruba tin su propio pagina riba Facebook cu por suministra informacion mesora asina cu tin algo oficial. Ta invita comunidad pa subi "Like" e pagina ey bou e nomber di "Korpspolitiearuba" y asina keda bon informa. Si bo tin cualkier pregunta of sugerencia, por mand’e tambe via e mesun sistema moderno aki.

Cuerpo Policial ta urgi ciudadanonan, pa yama 100 asina cu algo asina sosode cu nan, sea bo a bira victima di un caso di hortamento, atraco of cualkier delito. Tambe ora nota movecionnan straño of sospechoso, tur informacion ta yuda.

Polis ta consciente cu tin un aumento den casonan di ladronicia den comunidad. Pa esey, hunto cu Ministerio Publico, ta hibando un maneho riguroso pa persigui tur e gruponan cu ta haci nan mes culpabel na e tipo di "economia facil". Di otro banda, Mando Policial a percura pa creacion di varios ekipo adicional di Polis pa aumenta presencia riba caya, manera ta Polisnan patruyando den barionan, Flex Team, K9 Team, Mobiele Eenheid, Arrestatie Team y otronan cu ta patruyando diariamente na luganan strategico unda ta conoci cu tin sospechosonan ta frecuenta. Na tur tin 600 Polis trahando 24 ora pa dia pa garantisa proteccion na comunidad.

E ekipo di recherchenan cu ta investiga casonan di atraco, e asina yama "Atraco Team" ta ekipa cu hopi experencia, capaz pa investiga e casonan mas complica y dificil. Aruba orguyosamente tin un di e indice di solucion di casonan criminal di mas halto den henter e region Caribense.