Miles a bishita Aruba Art Fair e weekend tras di lomba

ORANJESTAD - Miles di hende a bishita e Aruba Art Fair e fin di siman aki na San Nicolas. Gobierno ta papia di mas di 10 mil hende. Hecho ta cu henter e fin di siman, San Nicolas a briya cu yen luz, color, arte den tur forma, y caranan di famianan contento. Hopi elogio a bay na e team cu a organisa Art Fair, na e artistanan pa nan colaboracion y tambe e ministerio di minister Otmar Oduber cu vision pa haci di San Nicolas e centro di cultura y herencia.

Grandi y chikito a disfruta y admira e obranan di arte na San Nicolas. Den entrevista cu algun persona cu a lanta y ta biba na San Nicolas, nan a comenta cu e desaroyo aki ta bon y nan ta aplaudi esaki. Sinembargo ta spera di mira continuidad den e desaroyo y tambe cu mas actividad ta wordo organisa regularmente na San Nicolas. 

Diabierna tabata e prome anochi, unda cu tabatin e fashion show cu por wordo describi den un palabra, fabuloso. Hopi hende a uni rond di e pasarela forma riba cayanan na San Nicolas unda diferente diseñadornan a show nan coleccion di paña, tas, accesorio entre otro cu diferente modelo local a modela.  E di dos anochi a atrae un publico masal, hende di tur parti di Aruba y bishitantenan uni na San Nicolas unda cu nan disfruta di algun ora yena cu cultura y herencia tabatin oportunidad pa nan papia cu e diferente artistanan, saca potret y djis sinta combersa y pasa un rato ameno, manera ta un custumber pa haci na San Nicolas. Riba e ultimo anochi diadomingo, tambe un multitud tabata presente ya for di 6or di atardi pa a drenta y e cayanan a djis keda yena. Hopi elogio a bin di artistanan internacional y local cu nos a entrevista, personanan den comunidad y bishitantenan. Pabien Aruba cu awor tin su Cultural and Heritage City, San Nicolas.