Accion di abogadonan cu piket prolonga cu 2 siman

ORANJESTAD - Abogadonan cu ta core piket, esta traha warda, a anuncia diabierna cu nan ta extende esaki cu dos siman mas. Esey ta nifica cu piket no ta wordo atendi pa casonan nobo e prome siman, y si ainda no tin resultado den e di dos siman, lo extende esaki cu no ta atende ningun caso mas di piket, esta ni nobo ni bieu. Abogado Jose Figaroa a sigura NoticiaCla.com cu esaki no ta viola nan huramentacion como abogado, pero cu enberdad e por afecta e caso di e cliente durante su caso. Algo cu segun e, ta cay pa responsabilidad di e minister di husticia Arthur Dowers. 

TARIFA BIEU

Segun Figaroa, for di 1997 caba e tarifa di 900 florin no a wordo ahusta y despues di 7 aña warda, abogadonan a bisa ta basta. E prome accion tabata cu pa 10 dia cu ta vence awe, cu a protesta of 'welga' unda cu no a core piket. Pero lamentablemente no a duna resultado aunke cu a sinta dos biaha cu minister, a dicidi cu ta prolonga e accion. "E prolongacion ta pa proximo 16 dia, cu ta un accion parti den 2 parti" Figaroa a bisa. E prome 8 dia lo sigui cu e accion manera cu e ta aworaki, esta no ta atende casonan nobo di hende deteni (den ora di piket), y si no haya oido den e prome 8 dianan aki pa algo fiho, lo bay over pa stop e trabounan di piket completamente. "Tanto casonan nobo como esnan andando. Esta casonan cu tin cu yega  raad, tampoco lo wordo atendi" Figaroa a sigui bisa. 

CONSECUENCIA

E hecho cu no ta traha piket, no kiermen cu un persona no por haya abogado. Solamente cu e no ta haya un abogado provee pa gobierno. E persona ta keda liber pa contrata su propio abogado. Riba pregunta di NoticiaCla.com, si esaki ta significa cu e abogado ta violando su huramentacion haci como abogado pa trata cliente.  E abogado no a huramenta pa haci piket segun Figaroa. E abogado kizas a firma un acuerdo cu gobierno pa cierto momento contra cierto pago ta haci cierto servicio di piket. "Bo no ta violando bo huramento pasobra bo no ta abogado di e persona ainda. Ta na momento cu bo ta presenta como su abogado, bo ta violando (bo huramentacion) pasobra bo no ta asisteer e cliente" Figaroa a sigui bisa. 

ACCION TA PERHUDICA CLIENTE?

E otro pregunta di NoticiaCla.com ta, cu e welga aki por perhudica e cliente cu e no ta haya un trato husto, of e por perhudica e sistema di fair trial, y dado momento te hasta pone cu e persona en cuestion por wordo laga liber. Pero segun Figaroa, esaki no ta e caso. Berdad e ta afecta e caso, pero no cu ta laga e persona liber pa falta di un abogado of algo particular, pero cu e por resulta cu e persona por haya menos tempo cera pasobra a 'viola' cierto derecho cu e tabatin. Por lo menos segun Figaroa. "E por ta un consecuencia di e accion aki cu hues lo tene na cuenta cu e acusado no a wordo asisti of giua manera mester ta na momento di su detencion. Pero no necesariamente ta nifica libertad di e persona". Pero Figaroa a admiti si cu esaki ta keda den man di hues. 

AUMENTO 100% HUSTIFICA?

Abogado Bryson a splica cu e hecho no ta cu ta pidiendo un aumento di 100%, cu ta loke de facto e peticion ta (subi e salario di 900 florin pa 1800 florin), sino mas bien si calcula e trabou ensera y kico ta kita di e pago etc, e suma ta resulta mucho mas abou (menos cu mitar) cu nan ta ricibi den nan man. Y si mira cu ta pa 7 aña nan ta bringando esaki, mester por compronde cu esaki ta dimas y cu awor esaki no por warda mas. Ademas a splica tambe cu a check cu tur otro abogado, afilia y no afilia, y tur a mustra cu nan ta sostene e causa aki. Esey ta significa cu no tin ningun abogado cu gobierno defacto por haci apelacion ariba pa e trabou di abogado liber. "Por lo menos no di Aruba", algun abogado a grita den fondo di e sala unda cu e conferencia a tuma lugar diabierna atardi.