No por considera e asesinato y e conferencia di felicidad riba mesun dia como un clash

ORANJESTAD - E hecho cu tabatin un conferencia di felicidad riba e mesun dia cu tabatin un caso di asesinato na Aruba, no mester wordo mira como un clash. Segun minister di turismo Otmar Oduber, e resultado di e conferencia mester satisface nos, y ta un acumulacion di varios encuesta cu ta mustra cu nos comunidad ta biba un bida feliz y satisfecho. E ta referi na e trabou investigativo di profesor Tico Croes cu a midi cu 78% di Aruba ta raporta di ta felis. "Esey no ta kita e responsabilidad cu tin pa susesidonan cu a tuma lugar" Oduber ta bisa refiriendo na e caso di asesinato. E ta considera e acto horibel, y cerca di amistadnan cu ta haci'e aun pio. 

MOMENTO PA REFLECCIONA

E mandatario ta considera esaki un momento pa reflecciona y realisa cu nos tin un trabou hopi grandi pa haci pa mantene e felicidad cu a logra crea na Aruba. "E no ta tuma gobierno so pa haci esaki. E ta un partnership. E ta tuma un nacion pa haci esaki" e mandatario a sigui bisa, refiriendo na un trankilidad cu nos mester. Mes momento e mandatario ta mustra di ta conciente cu no por cera wowo pa e situacion di seguridad na Aruba. Y ta e intencion pa sigui sostene e aspecto di seguridad na Aruba. "Ya caba nos ta haciendo esaki pa un par di aña, unda cu un suma di 3/4 miyon ta wordo dedica na polis atraves di AHSF" Oduber a bisa.  Siman pasa a acorda un suma adicional di 1 miyon florin di cual mei miyon lo wordo paga e aña aki riba loke a duna caba. E intencion tabata pa e siman aki mes transferi e placa riba e respectivo cuentanan.