Dispuesto pa pone 4 miyon disponibel pa seguridad

ORANJESTAD - Minister di turismo ta dispuesto pa pone mas placa disponibel di turismo pa seguridad, pero no por stop di promociona nos isla. No por stop di promociona Aruba y stop di tin evento cu ta atrae turista, pa solamente dedica e suma di placa na seguridad. Asina e mandatario di turismo Otmar Oduber a laga sa. No por dedica placa solamente na seguridad anto djey economicamente bo ta bay atras y ta crea mas problema pa seguridad. Segun Oduber, problema di seguridad hopi biaha ta aspectonan social, di bo comunidad. 

BRUHA TERA DEN ASPECTO DI PROMOCION

Ta papia di problema social local of di paisnan bisiña. "E dos cosnan aki mester wordo totalmente separa!", e mandatario a bisa. "Aruba no por hunga su cu su turismo". "Personanan cu ta purba trece esaki den discusion cu mester stop di promociona Aruba pa hinca e placa den seguridad, no ta compronde e materia of no ta realisa e consecuencia mas negativo si haci esaki" e mandatario a sigui bisa. Oduber ta kere cu mester combina nan dos. 

ESPACIO PRESUPUESTO ATA PA YUDA 

Tin espacio den presupuesto di ATA pa por brinda e ayudo (na seguridad). "Mi mes ta un voorstander cu na momento cu gobierno of parlamento bisa pa ban bek na e presupuesto di e aña aki ainda y cambia esaki na parlamento caminda cu fondonan cu gobierno lo por a ricibi a base di e resultadonan positivo di ganashi pa otro aña, porta nos ta bisa cu nos ta willing pa en bes di gobierno ricibi e placa den su caha como entrada, laga nos destina nan (4 miyon ) y pone suma disponibel pa seguridad. E ta referi na e hecho cu minister colega di husticia a mustra cu e mester di por lo menos 10 miyon extra pa por tin un miho seguridad pa Aruba. Di otro banda, e mandatario di husticia a rechasa mas fondo di turismo, pa 'evita polemica' riba e tema.