Dammers: Aruba atrobe front runner den Caribe riba asunto di aviacion

ORANJESTAD - Manera NoticiaCla.com a raporta caba, recientemente a tuma lugar firmamento di un sistema nobo pa asisti e controlador nan aereo di Aruba den sepera avionnan den nos espacio aereo. E firmamento a tuma luga entre ANSA N.V. pa pais Aruba y e compania Frances, Thales, cu kende pais Aruba ya tin un relacion di añanan pa locual ta ekiponan di nabegacion. Den casonan asina e ta haci e interface entre e diferente sistemanan uno mas facil. Parlamentario Chris Dammers, un experto di aviacion como ex director di DCA, tabata instrumental pa e logro aki y a bringa hopi tempo pa esaki. 

CUMPLIENDO CU 2 MOCION

Segun Dammers, pa e decision aki e minister cu ta responsabel pa cu transporte, Otmar Oduber, lo ta cumpliendo cu 2 mocion di Staten mas, esta uno cu ta pidiendo e minister pa bin cu un sistema di Radar of algo similar mas pronto cu ta posibel y un di 2 mocion (ora a trata e ley pa establece ANSA N.V.) pa duna e plan pa bin cu un radar of un sistema similar un prioridad mas halto cu ta posibel. Cu e firmamento aki e MLAT/ADS-B lo ta un realidad den lunanan di juli-september 2017. "Necesidad di un Radar ta data di añanan 1980, caminda cu ICAO a traha un raport specificamente pa Aruba hustificando esaki. IATA den su reunionnan regional tambe a jega di laga sa cu pais Aruba ta keda slowdown e trafico si e ta e unico den nos area cu no tin un of otro sistema di radar. ICAO a pone como exigencia cu tur pais entre añanan 2020 pa 2025 mester tin of cambia nan sistema di radar pa un ADS-B, cual ta un di e exigencianan di e plan mundial y regional di “Performance Based Navigation”. Cu e combination di MLAT/ADS-B e ta engrandese e posibilidad di capta no solamente avionnan cu ta ekipa solamente cu un ADS-B pero tambe esnan cu no tin ADS-B pero si un transponder cu mode A, C of S" Dammers a sigui bisa. "Cu esaki un bes mas pais Aruba ta demonstra di ta un front runner den Caribe siendo e prome pais cu lo ta cumpliendo cu e rekisito aki" Dammers a sigui bisa. E MLAT/ADS-B lo tin un cobertura di algo mas cu 50 nm cu ta duna e controlador aereonan un miho anticipacion di e avionnan cu lo ta drentando nos aerea di 25 nm.

BENEFICIO PA UN SISTEMA ASINA

E beneficionan di un sistema asina ta grandi na unda no solamente e controladornan aereo lo beneficia di esaki, pero tambe e aerolinanan den nan delay. Menos delay kiermen menos combustibel mester wordo kima cual ta refleha su mes den menos placa. Tambe pa tur e biaheronan y e aerolinea mirando cu nan tin e seguransa cu nan lo ta bulando den un espacio aereo ainda mas sigur.

CONTROLADORNAN AEREO

Pa locual ta e controladornan aereo sigur ta bai un aprecio y gratitud grandi mirando tur e añanan cu a transcuri – cu raport nan hustificando un radar – cualnan a sabi di haci nan trabou na un manera profesional, bou tur e stressnan extra di no tin un radar pa mustra cu gran seguridad unda cada avion ta, pero sempet a sabi di mantene nos espacio aereo sigur pa esnan cu ta nabega ey den.