Disfruta di Izaline Calister, Carlos Bislip Caribbean Combo y Fuente na Caribbean Sea Jazz Festival

ORANJESTAD - Pa celebra un gran etapa manera Caribbean Sea Jazz Festival su di 10 aniversario nan ta trece un line-up unico cu tanto artistanan internactional como nos artistanan local. Izaline Calister un gran artista di Curaçao a construi un trayectoria impresionante den e  ultimo 12 añanan. Cu su estilo encantador el a gana un grupo di fiel fanaticonan rond mundo. Izaline ta posee e don excepcional cu ta haci tur e diferencia pa ta un solista, ora e canta den su lenga materno, papiamento, cu sentimiento y gracia. E tin e capacidad aki de permanece fiel na su rais y a logra alcanza y conkista e publico di henter mundo,  cantando den un idioma desconoci, mientras cu eta  trece su show na perfeccionion. Izaline su musica ta un fusion entre e musica tradicional di su isla natal Curacao, cu influencia y jazz cu influencia Afro-Caribbense. 

E cancionnan, “Wow’i Cariño, Canta Hélele, Sa Sa Na Awasa” y su mas Reciente cancion “ Reina Di Pordon ” hunto cu Buleria tawata hitnan number 1 den Caribe. Su albumnan: “Soño di un  Muhé, Mariposa, Krioyo, Canta Hélele, Speransa y e album cu a lansa e aña aki Rayo di Lus a ser lansa rond mundo. Cu su gran banda y su areglonan Izaline semper ta cautiva y trece un ambiente special pa su publico den cualkier ocasion. Y e lo haci esaki diasabra 24 di september na Renaissance Festival Plaza unda e lo presenta su Album nobo Rayo di Lus pa e pueblo di Aruba. 

Mane tur aña no ta solamenete artistanan internacional lo presenta durante Caribbean Sea Jazz Festival, pero tambe nos gran artistanan local mane Carlos Bislip Caribbean Combo y e banda Fuente. Caribbean Combo ta un ensemble/grupo estableci di Scol di Musica Rufo Wever bou di e liderazgo di Carlos Bislip. E concepto di e ensemble aki ta pa familiarisa e musiconan hoben cu e ritmonan di nos region Caribe y Sur America como vehiculo pa alcansa nan meta. Caribbean Combo ta existi 5 aña caba, unda cu hopi musiconan hoben participante a bay scol y a haya nan training den nan “ Performance Practices” of “E Practicanan di Presentacion” di tanto Jazz como e musica Caribense. Hopi di e musiconan hoben aki a sigui nan propio caminda y ta formando parti awor di gruponan musical den diferente genero manera Musica Tropical y tambe a presenta den varios Caribbean Sea Jazz Festival. 

E edad di e participantenan aki ta varia entre 13 pa 20 aña. Bin apoya nos hobennan talentoso Diasabra 24 di september na Renaissance Festival Plaza. 

Fuente trio ta un extracto di e banda original Fuente, cu tawata consisti di 20 musico. E integrantenan di e trio aki ta Susjaira Kerpens (vocal y guitara) , Siegfried Hart ( caha y un poco di percusion) y Ivan Quandus (baho di 6 cuerde/ six string bass) cu ta toca un variedad di musica mixto cu e sabor di Jazz. Estilonan di Pop Latino, Caribense y musica local y Susjaira cu su bunita bos ta duna e musica su toke special. 

Un biaha mas Caribbean Sea Jazz kier invita pueblo completo pa bin disfruta un ambiento unico cu Caribbean Sea Jazz festival so por trece dia 23 y 24 di september. Carchinan ta obtenibel pa solamente $55,-. na Super Food, Valero Boulevard & Essoville, Plaza Book Shop, The Market at Alhambra, Cafe the Plaza, Moomba Beach, Palm Tours, Red Sail Sports & Pelican Adventures