A firma pa Aruba su propio sistema di vigilancia aereo

ORANJESTAD - ANSA NV a firma e acuerdo pa compra di un sistema moderno di vigilancia pa control di nos trafico aereo. Aruba ta e prome isla den Caribe cu lo bay tin e sistema aki cu por capta señal te na Boneiro. Aruba a scoge pa e sistema aki mirando cu ICAO ta exigi pa entrante 2020 paisnan mester cuminsa implementa esaki. Di e manera aki, Aruba un biaha mas ta un ‘front runner’. E suma inverti ta 1.7 miyon dollar. 

PROCESO PA INDEPENDISA TRAFICO AEREO

‘Esaki ta un continuacion di un proceso cu a inicia algun aña atras, un proceso cu no a bay facil. Un proceso pa independisa completamente e parti di entre otro e trafico aereo. Manera cu a compromete cu empleadonan y gerencia di ANSA, e paso cu a wordo tuma aki tabata e paso di mas solido cu por tabata existi pa e organisacion aki. Tabatin 3 meta e tempo ey, cual tabata pa prome privatisa/ independisa ANSA for di departamento di Directie Luchtvaart, di dos e posicion huridico y di tres e inversionnan grandi,’ Minister di Transporte Otmar Oduber a bisa. Siguridad ta algo cu a wordo salvaguardia na tur momento, empleadonan y naturalmente e proceso pa reconoce empleadonan a tuma luga y tambe ta tras di lomba. Awo ta na un momento historico pasobra a papia hopi decada riba un sistema di vigilancia (radar), caminda cu hasta den pasado a adkiri un radar, pero nunca a fungi pa e funccion cu e mester a fungi cual ta pa e trafico aereo. Awo den poco mas cu un aña y mey di existencia ya caba ta yega na e fase aki pa e bay den ehecucion den 2017, ela agrega.

INVERSION

ANSA ta invertiendo den e proximo 4 añanan nos dilanti un suma di casi 12 miyon Florin den mehoracion y den ekiponan. Entre 2016 - 2017 un suma total di riba 6 miyon lo keda inverti y awe lo firma pa e proyecto di sistema di vigilancia aki MLAT y ADSB caminda cu manera mi a wordo mustra, mester ta sumamente orguyoso pasobra Aruba ta front runner den Reino y regio cu ta cumpli cu un meta cu ICAO a pone unda cu den futuro 2020 kier mira cu tur avion y tur trafico aereo ta funciona conforme loke Auba awo a firma p'e. Esaki lo facilita, mehora y crea mas siguridad pa e trabou hopi fuerte y intenso cu nos controladonan di trafico aereo tin. Aruba tin un di e densidadnan mas halto pa loke ta trata e cantidad di avionnan cu cada controlado di trafico aereo mester maneha. 

SISTEMA MLAT Y ADSB

Joselito Correia de Andrade manager na ANSA a elabora riba e sistema cu Aruba ta bay haya MLAT y ADSB. “E sistemanan aki nos ta yamanan sistema di vigilancia y no un radar. Pasobra un radar ta forma parti di un sistema di vigilancia. E ta yuda e ‘air traffic controller’ pa wak ken ta bulando. Tradicionalmente tabata uza e sistemanan anticua, e solucionnan mas moderno cu tin ta esunnan cu a busca aworaki. E sistemanan tradicional tabata por solamente detecta e avion, pero no por sa kico ta su identidad of su haltura. Pa soluciona e problema ey a bin cu un otro sistema cu por duna identificacion di e avion, su haltura y detecta e avion tambe. Sin embargo esaki ainda no ta esun di mas moderno segun e ta splica. E sistema cu Aruba lo tin si lo por haya mas informacion di e avion, por ehempel por haya e posicion di e avion, su identidad y otro informacionnan manera haltura, velocidad, direccion y mas.