Art Fair fin di e siman aki cu obra di artistanan internacional y local

SAN NICOLAS -   E Art Fair e fin di siman aki na San Nicolas lo desplega arte di varios artista local & internacional. Pa loke ta e prijs e diferente dianan di Art Fair, Candy Rasmijn diahuebs a splica cu e fashion show cu lo tuma luga diabierna ta 50 florin pa entrada. Pa ta parti di e auction dinner cu ta tuma luga na e rotonde dilanti di Nicolaas Store ta 150$, pero bo lo ta parti di e fashion show y e auction dinner. E fondonan recauda pa esaki lo wordo uza pa por crea plataforma pa manda e studiantenan di arte internacional. Diasabra y diadomingo entrada lo ta 10 florin y lo tin actividad pa mucha. Si ta desea di cumpra un weekend pass cu ta inclui entrada pa tur tres dia, e lo ta 15 florin. Por paga na entrada, por cumpra tambe na e diferente Valeronan y Superfood. Diabierna actividad ta cuminsa 7or di anochi y diasabra cu diadomingo e lo cuminsa 6or di atardi.

INVITACION MINISTER

Minister di Turismo Otmar Oduber a invita henter comunidad pa bin San Nicolas e fin di siman aki dianan 16, 17 y 18 pa presencia e bunita obranan di arte crea pa artistanan local y internacional den nos cayanan. Por mira con e aspecto di herencia y cultura ta haya bida na San Nicolas.

“Un tras di otro ta brinda oportunidadnan pa crea di San Nicolas, un atraccion nobo pa nos turismo. Pero tambe un centro unda cu nos propio hendenan por bin busca nan identidad bek. Bo por mira e diferencia grandi positivo pa San Nicolas.” Candy Rasmijn a informa cu tin diferente obranan di arte cu a wordo haci pa 19 artista internacional unda cu nan a pinta diferente experiencia den comunidad. Pa 10 florin comunidad lo por mira obra di diferente artista profesional. Ta haya cu na momento cu ta habri e exposicion di artenan aki hunto cu galeria, cuminda, fotografia local entre otro cu lo wordo exponi, ta percura pa San Nicolas haya e miho di e miho’. Pa loke ta e duracion di e obranan na e murayanan di e diferente negoshinan Minister Oduber a informa cu e acuerdonan ta varia di entre 1 aña pa 5 aña. Y ta haci peticion na comunidad tambe pa cuida y balora e artenan aki cu e artistanan a traha riba dje cu hopi dedicacion pa San Nicolas y Aruba.