CBA: Economia Arubano debilita den prome trimester di 2016

ORANJESTAD - Indicadornan disponibel di e economia Arubano a demostra un debilitacion durante e prome trimester di 2016, refleha primordialmente pa un contraccion di 1,4 porciento den ingresonan turistico. Ademas, un mercado di credito cauteloso, bahadanan significante den entradanan di impuesto riba comodidadnan y BBO, como tambe caidanan den diferente indicadornan economico, manera permisonan pa construccion, confiansa di consumidor y importacion di alimento a enfatisa mas e condicionnan economico debil durante e trimester bou reviso. 

Riba e portada inflacionario, e promedio anual di e tasa di inflacion a continua su tendencia descendente durante e prome trimester di 2016 rebaha pa gran parti pa caida den prijsnan di gasolin. Ademas, un reduccion den tarifanan di electricidad (Januari 2016) y un consumo domestico debil a contribui na e continuacion di e nivelnan modera di prijs general. E desaroyo di prijs fundamental ta keda levemente inflacionario, ya cu e “core inflation” (inflacion excluyendo componentenan di alimento y energia) a subi te na 0,7 porciento.

Reserva di divisa neto a fortifica mas ainda den e prome trimester di 2016, creciendo cu Afl. 145,2 miyon te na Afl. 1.756,2 miyon, y na e nivel aki ta mas cu adecuadamente surpasa e normanan critico usa door di BCA, incluyendo e cantidad di lunanan di pagonan riba e cuenta coriente cu ta cubri door di e reserva di divisa neto (4,8 luna).

Basa riba calculacion reciente di BCA, e economia Arubano ta proyecta pa expande cu 0,4 porciento den termino real pa 2016, despues di a experiencia un crecemento negativo na 2015 (-0,5 porciento den termino real). En general, e prome tres lunanan di 2016 a cuminsa lento den termino di actividad economico. Señalnan di un potencial crecemento economico pa 2016 lo materialisa solamente si e re-apertura di e refineria y inversionnan relata na esaki wordo ehecuta manera a wordo planea.