Tereno na Dakota mester bira campo di refugiado pa 500 Venezolano

ORANJESTAD - Tanto Centro Deportivo Betico Croes como e tereno cu antes tabata e veld di Little League na Dakota, lo mester fungi como un campo pa un total di 500 refugiadonan Venezolano aki na Aruba. E ta parti di un draaiboek en caso di un exodus di Venezolano pa nos isla. Den un carta cu NoticiaCla.com a pone man ariba, director di DOW Marlon Croes ta pidi minister di infrastructura Benny Sevinger permiso pa prepara e tereno en cuestion na Dakota pa comberti esaki den e centro di refugiado, y rechasa mes momento tambe un peticion di un 'tercer' partido pa otro uzo. 

EXODUS Y PLAN 'SECRETO'

Mes momento ta sali na cla cu Aruba ta preparando pa un exodo di Venezolano pa Aruba. Un plan cu pa hopi tempo tabata 'secreto' y of tabata wordo desmenti. Cu e carta aki, ta prueba cu ta preparando pa e yegada di un grupo cuantioso di Venezolano, y cu e ta pa un periodo di por lo menos 6 luna. 

DRAAIBOEK PA REFUGIADO

E carta ta referi na e plan di rampenbureau y DOW, pa e eventualidad cu refugiadonan di Venezuela cuminsa yega Aruba. Como draaiboek, a pone Centro Deportivo Betico Croes na Sta Cruz como e prome punto di encuentro y alohamento, pa e prome 72 ora di nan yegada. Despues ta mobilisa e grupo(nan) aki pa e tereno cu antes tabata e parke di Little League na Dakota. Awe e tereno aki ta bandona, y tin solamente algun edificio cu a keda como 'recuerdo' di e tempo di baseball. Den e carta cu NoticiaCla.com ta referi na dje, ta pidi permiso pa 'benta' e edificionan ey abou, y 'prepara' e tereno pa por converti e tereno completo como un centro di refugiado Venezolano. Un situacion cu mester dura pa por lo menos 6 luna prome cu e Venezolanonan aki por wordo procesa. 

CRUZ CORA

E tereno na Dakota, unda cu kier establece e centro di refugiado, ta 'bisiña' di Cruz Cora cu ya caba tin nan shelter pa por acepta personanan refugia. Den combersacionan anterior cu director di Cruz Cora, a mustra caba cu nan ta prepara pa un situacion, aunke cu falta di informacion di parti di gobierno riba e tereno aki. Awor cu ta mira e plan di DOW y rampenbureau, no ta conoci con hopi e tarea di Cruz Cora lo ta, si esey bira realidad y con den realidad e tarea lo por ta.