Wever-Croes: Ami no ta busca problema cu ningun hende den Parlamento

ORANJESTAD - Situacion a hera sali for di man den Parlamento. Esaki despues cu Parlamento no a honra e peticion di fraccion di MEP pa un debate publico cu minister Dowers tocante criminalidad, pasobra e parlamentarionan di AVP a pidi pa mas tempo. Segun lider di fraccion di MEP, AVP kier sinta scucha e minister den un bijeenkomst, siendo cu pa MEP, ta basta cu bijeenkomst. "Ta den un debate publico bo por presenta mocion y tuma decision. Y esey ta loke pueblo kier" Wever Croes a bisa.

REACCION WEVER CROES

Lider di MEP Evelyn Wever-Croes a reacciona bisando cu e ta lamenta esaki. "Tur hende conoce e situacion di inseguridad na Aruba, puntra ken cu bo kier. Tur hende na Aruba kier accion. Ta basta di papiamento bunita, awor pueblo ta spera un accion di parti di Parlamento". Segun Wever, aparentemente e unico 11 personanan na Aruba cu no ta sinti esaki, ta e 11 parlamentarionan di AVP. Ta e 11 parlamentarionan di AVP so mester mas tempo y mas papiamento bunita. Siendo cu cada momento por sosode un otro desgracia. "Mi ta puntra mi mes si nan kier carga esey riba nan consenshi. Mi a bisa nan esey tambe, cu e sigiente morto ta riba nan consenshi. Mi ta hopi indigna cu e parlamentarionan di AVP ta scoge pa proteha nan minister, en bes di proteha pueblo di Aruba, sigur si mira e situacion peligroso cu nos pais ta bibando aden. Berdad mi a rabia y a bisa esey na bos halto" Wever a admiti.

PLEITAMENTO NI INSULTO

Wever ta sigura si cu ningun momento tabata tin pleitamento ni insulto di su parti manera un otro articulo ta insinua. "Sra. Velasquez a cuminsa gritami, y yamami pa ladron. Bo por mira esey claramente riba un video cu ta circulando tambe. Tambe bo por scucha con e publico tabata grita y insulta nos, hunto cu sra Velasquez. Pa evita cu cos sali for di man, mi a sali for di sala, pasobra mi no ta rebaha mi mes na e nivelnan ey" Wever a sigui bisa. " No ta prome biaha cu sra. Velasquez ta busca problema cu mi, pero ami no ta interesa den e cosnan ey. Ami ta den Parlamento pa sirbi pueblo di Aruba, no pa parlamentarionan baha nan frustracion riba mi. Pues, ningun momento mi a insulta ningun hende. Loke si mi a bisa nan cu nan actitud ta pone cu e sigiente morto den atraco ta riba nan conseinshi tanten cu nan no kier tuma accion", lider di MEP a finalisa bisando.NoticiaCla.com a busca reaccion di fraccion di AVP pero ainda no a logra esaki. NOTA: VIDEO CORTESIA 24ora.com