Taleb Rifai a felicita Aruba pa ta e luga mas bishita den Sur Caribe

ORANJESTAD - Riba e prome dia di e conferencia di turismo, Happines 360 cu ta andando, Dr. Taleb Rifai, Secretario General di United Nations World Tourism Organization (UNWTO) tabatin palabra elocuente pa Aruba y su mandatario di turismo. E discurso a resalta e importancia di turismo den e mundo actual, su relacion cu felicidad y tambe cu cultura. 

BIAHA ROND DI MUNDO

Rifai a bisa cu biahamento ta haci mundo uno mihor, cu felicidad no solamente ta un sonrisa riba bo cara, e ta satisfaccion, e ta un forma di pensa.  Mientras tanto el a pone enfasis cu turismo mester wordo integra cu cultura, asina e ta funciona mihor, pasobra cultura ta e capital natural di turismo.  Segun e orador, nos por ta orguyoso cu e dos factornan importante aki pa nos futuro ta ocupa posicionnan clave den maneho di turismo y como tal manera Sr. Rifai mes a bisa, ‘Aruba is leading the way’.

PALABRA PA MINISTER ODUBER

E tabatin palabranan elocuente pa Minister di Turismo bisando: ‘Otmar mi amigo, bo ta un tremendo representante di Aruba y bo a demostra cu un isla chikito por hiba un mensahe grandi, un mensahe mundial’. El a bisa tambe cu pa tene un reunion riba un isla, semper e ta un experiencia special y e ta sumamente contento di ta riba e isla pa celebra e indice di felicidad aki. Por mira con hende por crea mihor bida pa nan mes. Aruba tabatin 50% mas ‘overseas visitors’ na 2015 compara cu 2010. Den 5 aña por a aumenta cu 50%. "Mi ta felicita Aruba pa ta e luga mas bishita den Zuid Caribe, unda cu tin mas bishitante per capita na mundo".

"Kico ta asina special di Aruba " Rifai a puntra den un combersacion cu Prome Minister Mike Eman, pasobra tin algo special y ta sinti esaki. "Mi tabata purba di saca esaki afo pero mi no por a cay riba dje. Pues Sr. Eman a mira e mata (kwihi) cu tabata ilustra prome cu e meeting a cuminsa y ela bisa esey ta Aruba. Bo por a mira e lama su tras y bo ta bisa di biaha cu esey ta Aruba. Un mata bieu y fuerte, sinembargo para firme riba un beach seco. Cu un paisahe bunita su tras cu ta ilustra e futuro, e mata aki ta dobla, pasobra e no ta resisti e biento. Pero a pesar di su forma dobla e ta firme y ta mustra sigur cual ta representa e hendenan di e isla" Rifai a sigui bisa.

TURISMO Y SU CIFRANAN

Turismo awendia ta responsabel pa 10% di GDP y 7% di exportacion y 30% di comercio y servicio mundialmente. E ta creando 1 di cada 11 trabou rond mundo. Na aña 2015 tabatin 1187 miyon viahero internacional cu a crusa frontera den un solo aña. Esey ta casi 1.2 biyon viahero internacional. Esey ta casi 1 di cada 7 hende na mundo cu ta haci un viahe internacional cada aña. Esaki no ta un actividad normal. Esaki ta un revolucion di viahe." Esaki ta e tempo cu hende ta viaha sin cu tin restriccion e ta un derecho humano aworaki, Rifai a bisa finalmente.