OM: Caso di atraco cu morto na Wayaca lamentabel y shocking

ORANJESTAD - Ainda e atracador cu a mata un ciudadano na Wayaca ta fugitivo, pero posiblemente herida. Asina vocero di ministerio publico Ann Angela a informa prensa diamars atardi. Manera conoci, awetardi a tuma lugar un atraco pisa riba un cas unda cu tiro a cay y unda tabatin dos victima, di cual uno a fayece y e otro a resulta herida. Ministerio publico ta considera e caso hopi lamentabel y shocking pa comunidad di Aruba y sigur pa famia di e victimanan. "Cu algo asina por a sosode di dia cla den in bario trankil, ta casi inimaginabel." Angela a sigui bisa. 

INVESTIGACION GRANDI A CUMINSA

Polis y ministerio publico a start mes ora cu investigacion y a lanta un asina yama TGO (Team Grootschalig Onderzoek), loke kiermen cu e investigacion ta wordo atendi na grandi cu un team grandi di recherche. Angela a informa tambe cu a logra caba pasonan importante. Entre nan ta menciona cu a haya un auto cu ta di interes pa e investigacion. "Di parti di polis y ministerio publico un suplica ta bay na ciudadanonan di Aruba pa duna mas tanto informacion posibel. Si sa algo of mira algo, informa polis mes ora. Ta danki na informacion cu a haya te awor cu a yega asina leu caba den e investigacion y cu por ehempel, a haya e auto" Angela a sigui bisa.

CLARIFICACION DI POLIS

Polis mes momento a clarifica cu tin dos informacion eroneo ta circulando, principalmente via social media. E prome ta cu e di dos victima di e tiroteo di awe tambe a fayece. Esaki no ta corecto. E di dos victima ta stabiel.E di dos informacion ta cu lo tabatin un atraco awetardi na Save a Lot na Noord. Esaki tambe ta incorecto ya cu esaki no ta berdad.  Cuerpo Policial kier avisa cu nan ta investigando e casonan di awe y a pone extra vigilancia riba caya pa reestablece orden y pa pueblo por ta trankil. Tambe nan kier recorda pueblo pa por fabor meld cualkier informacion inusual via tiplijn di polis na 11141 of yama central di polis na 100.