Atracadornan a tira dama mata durante atraco na Wayaca

ORANJESTAD - Un atraco arma den bario di Wayaca a laga un persona morto y un persona gravemente herida. Algun persona arma a drenta e cas di e comerciante (a compronde cu e ta Chines), y durante e atraco, a los varios tiro riba e habitantenan di e cas. E señora a fayece na e sitio y e otro a keda transporta pa hospital. NoticiaCla.com presente na e sitio a tuma nota di e ekipo di recherche cu a mobilisa diripiente pa un otro cas den e mesun caya, pero no ta conoci si e caso ta relaciona cu e atraco aki. E atracadornan a bandona e sitio den un auto Honda color blanco, cual polisnan a haya mas laat na Santa Cruz. Mas prome tabatin un otro caso di atraco, e biaha aki riba un persona cu tabata depositando placa na e ATM di Aruba Bank dilanti di pomp di Valero na Boulevard. Mucho mas informacion no tin den forma oficial, aunke ta papia cu a agredi e dama y cu e dama a dal abou y cu e mester a haya asistencia di ambulance na e sitio.