Refunjol: Diferencianan di opinion no mester dividi pueblo

ORANJESTAD - Aña Parlamentario 2016 a keda habri awe mainta pa Su Excelencia Gobernador Fredis Refunjol, cu a bira mesora e di 31 biaha cu e ta presencia esaki. Mientras cu e discurso (prepara completamente pa gobierno) mester relata e maneho pa e proximo aña, toch tabatin puntonan di referencia pa e trabounan logra durante e aña anterior. A resalta e.o. e loke a keda logra manera e reapertura di refineria, plannan di sostenibilidad, green corridor y mas. Ademas a referi na e hecho cu recientemente a presenta e presupuesto pa e aña siguiente, na tempo. E logro di mantene e deficit di nos pais na 0.5% di e PIB tambe a haya atencion den e discurso. Despues a sigui pa e proyectonan presenta pa e proximo aña. 

DIFERENCIA DI OPINION

Gobernador Refunjol a trata tambe e aspecto di diferencia di opinion, un topico cu sigur ta hopi actual den politica, no obstante cu e ta un discurso prepara pa gobierno. "Como representantenan di henter comunidad ta boso tarea, pa activamente busca e balansa entre continuidad y renobacion, entre desaroyo economico y mehoracion di calidad di bida den e forma mas amplio posibel" Gobernador a bisa. "Parlamento y Gobierno t’ey pa sirbi bienestar general, conciente di cu interes general no ta igual na tur e interesnan particular. Discusion publico habri, di temanan importante pa nos comunidad, ta un elemento esencial pa un democracia bibo. Sinembargo nos tin e obligacion pa percura cu diferencianan di opinion no comberti den division di pueblo". Ademas Gobernador a mustra tambe cu e ta e tarea di lidernan politico, empresarial, social, religioso, sindical y profesional, pa duna e ehempel di con ta discuti temanan importante pa nos comunidad, den un forma racional, sin ofensanan personal of uzo di instrumentonan destructivo of descriminatorio. " Opinionan diverso, aceptacion di desicionnan democratico a base di debate y dialogo ta esencial pa un estado di derecho". A mustra tambe riba e tarea di gobierno pa cumpli cu norma y balornan. "Gobierno ta stipula regla y ta ehecuta esakinan pa matene orden publico y seguridad riba nos pais. Gobierno tin un tarea ehemplar den cumplimento cu e normanan aki pa asina garantisa integridad di aparato gubernamental" Gobernador a sigui bisa. Lesa e discurso completo di Gobernador di Aruba aki.