Elmar: Ta dos incidente parew a causa interupcion di coriente

ORANJESTAD – Dos incidente simultaneo tabata e causa cu diahuebs anochi algun barrio di Aruba a keda sin coriente. Manera cu NoticiaCla a raporta caba, tabata diahuebs anochi alrededor di 8:52pm cu N.V. ELMAR a haya su mes confronta cu un interupcion den suministro di coriente den vecindario di Paradera. E motibo di e interupcion tabata un corto circuito riba un palo di luz di tension halto (12.000 volt), ocasiona door di un accidente na altura di Paradera 36A.

Pa 9 :30pm e suministro di coriente den e barionan di Meiveld, Pavia, San Barbola, Roncado, Bloemond, Crystal, Babijn, Marawiel, Koeriboeri, Rooi Prikichi y Casibari a keda reestableci, menos e areanan di Paradera, Sero Patrishi y Rooi Afo. Despues di a haci e reparacionnan necesario, a reestablece suministro di coriente na e areanan ya menciona banda di 5:50am.

Tambe, e mesun diahuebs anochi ey, alrededor di 9:35pm tabatin un interupcion den e suministro di coriente den e areanan di Oranjestad, Dakota, Wayaca y Sabana Blanco. E motibo di e interupcion no tabatin nada di haber cu e accidente na Paradera, sino mas bien un problema interno na WEB Aruba NV. Pa 10:35pm e suministro di coriente a keda reestableci. No por keda sin resalta e hecho cu tecniconan di N.V. ELMAR a responde mesora despues di ambos incidente, specialmente na Paradera pa por a reestablece coriente bek, mester a drecha e palo di luz envolvi den e accidente. Mientras pa e interupcion den Oranjestad, mester a warda riba WEB Aruba N.V. pa por a haya mas coriente pa asina distribui segun e demanda. N.V. ELMAR a pidi disculpa na su clientenan pa e inconveniencia cu e interupcionnan aki por a ocasiona. Ta bon pa enfatisa cu den ambos caso, e interupcion tabata for di mannan di e compania nacional di distribucion di coriente.