Cova: A inicia mobilisacion pa paro general na Corsou!

WILLEMSTAD - Meymey di un situacion confuso, lidernan sindical na Corsou lidera pa Errol y Alcides Cova a anuncia den sala di SSK cu proceso pa mobilisacion pa paro general a inicia. No sa ki dia e paro general ta cuminsa, pero a pidi tur sindicatonan pa topa diamars mainta 10'or pa cuminsa e mobilisacion pa e paro general. E ta nifica cu por spera problema cu suministrio di coriente, awa y tambe gasolin. 

SITUACION NA CORSOU

Esaki Cova a bisa den un entrevista en bibo, transmiti e.o. pa Telecuracao dialuna anochi. "Contratistanan no ta duna mas cu locual nan a bisa, cu ta 500 florin" Cova a bisa. A sigui un apertura pa PWFC pa un financiamento pa e suma, pero a nenga esaki. Kier pa paga e cen pa nan y no financia nan. "Nan kier pa otro pag'e y p'esey ela pega. Gobierno a bisa cu nan ta sigui busca y cu mayan nos lo tende" Cova a bisa. 

MOBILISACION 

Sindicatonan mientrastanto a mobilisa tur nan hendenan pa un situacion cu nan ta considera un momento hopi serio na Corsou. "Casi tur sindicato di Corsou ta presente pa mira ki conseho ta duna e trahadonan. E accion ta continua. A tuma un desicion hopi importante cu ta sindicalismo di Corsou mayan ta cuminsa mobilisa atraves di central di sindicatonan pa yega na un paro general, un welga general na Corsou" Cova a sigui bisa. Lo prepara esaki hopi bon pasobra segun Cova, ta inaceptabel cu derecho di trahado, e manera cu ta wordo trata, ta inaceptabel. P'esey a tuma e paso hopi serio y organisa. For di diamars mainta 10'or ta cuminsa e mobilisacion. FOTO TA CORTESIA TELECURACAO