Maduro: Nos ta siña hobennan pone nan conocimento financiero den practica

ORANJESTAD - E proyecto "Earn Your Future" a nace na 2014, ora cu PwC Aruba tabata busca un manera pa sigui aporta na e comunidad y hubentud di Aruba. Despues di a haña un proyecto similar na Estados Unidos, PwC a traduci, adapta y a proef draai e programa aki. Abase di comentarionan cu a ricibi di maestronan, cabesantenan di scolnan y SKOA, PwC a finalisa e programa y asina logra traha un programa pa muchanan di 6e klas. Asina Lorena Maduro, directora di Business Accounting Services pa PwC Aruba a trece dilanti, splicando e esencia di e proyecto Earn Your Future.

Despues di e proyecto "Earn Your Future" na 2015, PwC a ricibi varios peticion di diferente scol pa asina ripiti e programa. Pa e motibo aki PwC Aruba a dicidi cu lo bolbe bay comparti nan habilidad, experticio y recurso pa completa e programa y siña e muchanan tocante budgeting y spaar. PwC ta sumamente contento cu e oportunidad cu nan ta ricibiendo di por atrobe bay comparti 2 mainta cu e muchanan pa asina aporta na nan conocemento. E programa ta consisti di 2 les y cada les lo dura 45 minuut. 

Segun Lorena Maduro, si wak bek na e muchanan cu PwC a bishita aña pasa, por evalua cu muchanan di 6e klas ta muchanan cu tin conocemento di e materia aki caba. Di loke por a compronde di maestronan ta cu di 1e klas, ya caba nan ta haña les encuanto placa, por ehempel cu nan ta siña conta placa chikito (5, 10, 25 cent y 1 florin). Esaki ta haci cu ora PwC ta bishita muchanan di 6e klas, e ta bira un cuestion di mustranan con pa aplica nan conocemento den practica, por ehempel, door di siña nan pa ta mas conciente di placa y pa maneha esaki na un manera responsabel.

PwC Aruba ta gradici DPS, SKOA y tambe cabesantenan di tur scolnan cu ta brinda PwC e oportunidad pa e aña aki atrobe bishita skolnan di Aruba pa asina por aporta na e conocemento di e muchanan den e parti di finansa.