Minister a felicita Dialyse Kliniek cu nan 35 aña di existencia

ORANJESTAD - Dialyse Kliniek na Dr. Horacio Oduber Hospital ta celebrando 35 aña di existencia.  Den cuadro di esaki tabata tin un celebracion dialuna mainta dilanti di e edificio. Pa esaki a invita diferente persona y prensa unda entre otro, Director Financiero di HOH , Teo de Kool como tambe Minister di Salubridad Dr. Alex Schwengle a hiba palabra.

COMIENSO DI E CLINICA

Minister Schwengle a expresa cu tabata na 1981 cu e clinica di Dialyse a lanta y tabata tin docternan manera docter Wever, docter Anaya y docter Falconi cu a traha duro pa bin cu e Dialyse Center manera cu e ta awendia.  Mas cu logico cu tin coleganan nobo cu ta eherciendo e funcion di nefrologonan. "Importancia di e 35 aña ta cu awo nos kier duna un servicio necesario, unda cu bo ta haya pacientnan cu nan riñon no ta funciona bon mas y cu si nan no por haya e servicio aki na Aruba, nan no mester bay afo manera antes", e mandatario a splica. Ta p'esey ta hopi importante pa duna un servicio di dialyse na Aruba pa e ora e pacientnan por keda na e isla, sin mester di bay otro pais. Cu esaki por mantene e pacient na bida, pasobra si nan no haya dialyse bo lo por fayece,  Minister Schwengle a subraya.