Doño di The Alley: Algo organisa profesionalmente

WILLEMSTAD - Camara di vigilansia p’aden y rond di e club, seguridad na porta y p’aden y consulta regular cu polis: e doño di e club The Alley, Michael Cijntje, a haci – segun e ta bisa – tur cos pa evita incidente. Toch a logra contrabandia un arma di candela siman pasa y a tira dos hoben adulto mata den e establecimento.

Ta bisa cu ta trata di un pleito cu a sali for di man alcansando un di e victimanan pa ekibocacion y e otro intencionalmente. Segun Cijntje, e arma a drenta despues cu a cumpra un security guard. “Tur cos tabata organisa di adelanta. Nan kier a laga tur hende mira cu por a tira e mucha homber ey mata gewoon asina.”

Nunca prome

Cijntje tin 26 aña den horeca y nunca prome ela experiencia algo asina. “Como empresario bo ta haci esfuerso pa evita algo asina, pasobra e por significa bo ruina. Bo kier haci tur cos pa garantisa seguridad, pero niun hende por cu gang-, likidacion- y tiroteonan organisa. Esaki por a sosode na cualquier otro sitio.”

Downtown Management Organization tin años ta bringa pa un centro di ciudad bibo y sigur. “Si, a tira dos hende mata den Punda, pero ta cuanto biaha esaki ta sosode? Ya pa hopi aña Punda ta birando mas y mas sigur y claro cu esaki ta teribel, pero con bo ta evita algo asina?”

Sin miedo

E tiroteo aki no ta e unico incidente cu a sacudi e islanan. Dos siman pasa a tira un agente policial mata na Boneiru durante un persecucion y Ministerio Publico ta confirma cu e suministro di armanan ilegal ta siguiendo sin mengua. Toch agente policial Tico Ruiter di e cuerpo policial di Corsou (KPC) no ta kere cu ta birando mas peligroso riba e islanan. “Semper tin cos ta sosode, pero awor e ta bini mas den medionan social. Tur hende ta papia riba esakinan. P’esey nos ta mas conciente di e peligernan y di con facil ta bira coy un arma.” Ruiter ta conta cu semper su team ta bay prepara na un sitio di crimen y cu di antemano ta haci un analisis di riesgo. “Nos sa cu tin arma den circulacion y naturalmente algo por bay robes: un quimico tambe conoce e riesgonan di e profesion, pero ami no tin miedo. Mi pareha si ta suspira, por cierto, ora mi cana drenta na porta atrobe anochi.”

Plan di accion

Dos aña pasa a cuminsa cu e proyecto ‘Ta Basta Awor’ pa detecta armanan ilegal y pa baha nan cantidad. Entretanto a finalisa esaki y ni na Ministerio Publico ni cerca polis no tin plannan pa un proyecto por estilo. “Ta net un siman a pasa, pues na e momentonan aki nos no ta tratando cu proyectonan manera esun ‘Ta Basta Awor’”, vocero di polis Imro Zwerver ta bisa. “Pero mi no ta exclui cu lo bini cu accionnan.”

E siman aki, Ministerio Publico a presenta su vision riba combatimento di criminalidad pa e añanan benidero. Aunke Ministerio Publico tin solamente e tarea pa persigui, e ta indica di kier ta mas envolvi den henter e combatimento: “Ministerio Publico kier ta un partner den seguridad cu ta accesibel y cu ta un partner di balor igual ku ta busca e consulta i e colaboracion cu partidonan relevante.”

The Alley cera

Doño Cijntje di The Alley kier laga tur cos sak un rato prome y a cera su club por lo pronto. “Mi mester pensa riba un kier otro y wak despues con mi ta sigui”, e ta bisa afecta.

Autor Elisa Koek  Ret Karibense