Lopez a gradici pa sosten como Presidente Parlamento

ORANJESTAD - Dialuna Parlamento ta eligi su presidente y vice presidente pa e proximo aña Parlamento. Y tur cos ta mustra cu e actual presidente di Parlamento Marisol Lopez Tromp lo no keda re-eligi dialuna mainta. Lopez Tromp riba su pagina di Facebook diadomingo a pone un video cu por wordo considera como un compilacion di su trabounan logra. Mientras cu e no ta dispidi 'formalmente' di e funcion den e video, hopi ta considera esaki tambe como su despedida.  

AÑA DIFICIL PA LOPEZ TROMP

Lopez Tromp no tabatin un aña facil como presidente di Parlamento y varios incidente y confrontacion, votacionnan y mas durante curso di ultimo lunanan particularmente a mustra cu su fraccion (y posibel otro fraccionan) no ta di acuerdo cu su pensamento y forma di traha. For di varios parti, NoticiaCla.com a tende cu tur cos ta mustra pues cu Lopez lo no keda re-eligi y cu e fraccion mas grandi den Parlamento lo postula otro miembronan pa e funcion di presidente y vice presidente. 

VIDEO DI 'DESPEDIDA'

Den e video di algo mas cu 3 minuut (3:40 minuut), Lopez a gradici pa e confiansa y a relata e trabou cu el a haci den su funcion. "Mi kier haci uzo di e oportunidad pa gradici tur esnan cu a duna'mi sosten den e tarea di presidente di Parlamento" Lopez a bisa den liña grandi. "Bo ta representa e pueblo, y no bo partido" Lopez a sigui bisa den un di e fragmentonan di e video. Ademas a repasa e momentonan dificil cu tabatin di confrontacion, protestanan, pero tambe reunionan den exterior cu ela presidi, y e logronan cu a bin bou di su presidencia. Por considera e video como un gradicimento, un repaso di su trabou y un despedida como presidente di Parlamento. 

CANDIDATONAN POSIBEL

Den un combersacion recien cu Marlon Sneek algun siman pasa, ela splica NoticiaCla.com cu publicamente no tin candidato ainda cu ta poni pa e funcion pero cu lo delibera riba esaki na su debido tempo. No kier a menciona nombernan specifico como tal. Tanto Chris Dammers como Mervin Wyatt Ras den pasado a fungi como presidente y vice presidente y tin e experiencia. Di otro banda, debi na e incidente entre Chris Dammers y Marisol Lopez Tromp, lider di nan fraccion Rene Herde e tempo ey a bay asina leu di bisa cu e ta haya personalmente cu ambos mester retira di nan funcion.