Pop-up Cleanup a haci mondi di 'Shete' limpi diadomingo

ORANJESTAD - Un grupo di 30 pa 40 hoben y adulto diadomingo un biaha mas a sali cu e meta pa haci parti di nos isla limpi. Pop Up Cleanup, manera e grupo ta yama su mes, e biaha aki a scoge pa haci e 'mondi' di Shete limpi. E intencion ta pa no djies haci e area limpi nan so, pero involucra e bisiñanan di e area pa nan sigui despues pa mantene esaki limpi. E ta un di e criterianan cu e grupo ta uza, ora scoge un lugar pa haci limpi. 

POP UP CLEANING HISTORY

E grupo pa e ultimo 6 lunanan ta haciendo e limpiesa na varios parti di e isla. Diadomingo tabata esun number 6. E grupo cu ta bin, mester bin cu nan propio material cuminda y awa, y ta haci e limpiesa durante 3 ora mainta. E grupo a cuminsa hopi chikito cu un grupo di amigo cu kier a haci limpi y wak si tin suficiente interes pa haci nos mondinan limpi. "Nos a lubida e mondinan tambe mester ta limpi" Tatiana Becker, ingeniero medio ambiental cu ta un di e motornan tras di e grupo, a bisa NoticiaCla.com.  Nan no ta un fundacion, y como tal no ta haya subsidio. Nan ta haya sponsor si pa algun material, pero tur cos ta bin di nan mes. Material cu nan ta ricibi ta p.e. saco di sushi, handschoen y 'litterpickers'. 

CRITERIA PA E SITIO

E criteria pa scoge un sitio dificil. E intencion ta pa haci un lugar limpi cu no ta un 'dump'. "Si e ta un dump, e mester bira trabou di gobierno" Becker a bisa. E hendenan cu ta bin haci e trabou, kier un lugar sushi, y no wak sushi cada pida lugar. "Nos ta busca e lugarnan cu ta basta sushi, pero no dumps. Lugarnan unda cu hende ta tira sushi for di p.e. nan bentana" Becker a sigui bisa. 

VOLUNTARIO DERROLD WINKLAAR

Un di e voluntarionan cu a participa den tur e 5 biahanan cu e grupo a opera, ta Derrold Winklaar. E ta conta cu el a cuminsa cu e grupo chikito na Sero Biento banda di un supermercado Chines. "Desde eynan e iniciativa a bin pa nos cuminsa at least dos biaha pa siman nos haci un limpiesa" Winklaar a sigui bisa. Segun Winklaar e limpiesa di diadomingo ta number 6. "E prome tabata un grupo chikito, y e di dos tabata un grupo hopi mas grandi na Seroe Janchi. Mas di 50 hende". Pero despues pa falta di promocion, el a cay un tiki unda cu no a haya mucho mas hende. Diadomingo sinembargo tabatin un grupo grandi atrobe. 

MOTIVACION PA HACI E TRABOU DI LIMPIESA

Su motivacion pa participa na e limpiesanan aki ta su amor pa su isla. "Mi ta Rubiano, mi ta stima mi isla" Winklaar a bisa. E kier haci algo bek pa Aruba den un forma asina. Y mirando cu tur biaha limpiesanan ta concentra den areanan popular di turismo, e kier haci algo diferente. "Nos a limpia na Butucu. Si bo wak con sushi Butucu tabata, e pida camindanan. Hopi jammer pa wak con hende ta benta cerbez, plastic, afo for di bentana di auto" Winklaar a bisa.