Minister Oduber a ricibi Secretario General WTO Taleb Rifai

ORANJESTAD - Diadomingo anochi minister Otmar Oduber a ricibi e Secretario General di World Tourism Organization, Taleb Rifai, cu a yega Aruba pa forma parti di e conferencia Happiness 360 World Tourism Conference cu lo tuma lugar 13 y 14 di september na nos isla. Dr. Taleb Rifai lo ta orador principal y lo ta formando parti di e panel na e conferencia mundial aki cu lo trata tendencianan global y sinergia entre turismo, cultura y felicidad di cada nacion. 

INVITACION

E invitacion pa e conferencia aki a wordo haci dor di Minister Oduber na Dr. Rifai na Medellin, Colombia durante e Asamblea General di United Nations World Tourism Organization (UNWTO). Durante un audiencia cu e mandatario tabatin cu e Secretario General a splic'e e intencionnan di Ministerio di Turismo pa haci di e Indice di Felicidad parti di e maneho nacional y e relacion di esaki cu ‘Aruba One Happy Island’. Dr. Rifai semper a para tras di e concepto di Indice di Felicidad cual a wordo presenta precisamente dor di Minister Oduber na 2014 na Mexico durante e Conferencia di World Tourism Organization, durante cual e tabata orador invita. 

Dr. Taleb Rifai for di prome momento a indica cu lo ta un placer pa por ta presente durante e conferencia aki cu lo conta cu presencia di mas di 100 dignatario y delegadonan internacional y cu ta wordo organisa dor di Gobierno di Aruba hunto cu ATA y den colaboracion cu UNWTO.