Zenitel ta cambia su nomber pa C3

ORANJESTAD - Na final di aña pasa, Curacao Growth Fund a tuma Zenitel Caribbean B.V. na su encargo for di Zenitel Group. Durante di esaki, a palabra cu e compania lo haña un nomber nobo dentro di un aña. Ayera a yega asina leu, cu durante di un evento organisa special pa su clientenan, director di Zenitel Bert Schreuders, a lansa e nomber nobo. Entrante awor e compania lo yama “C3”, Critical Communication Caribbean.

E nomber, cortico y potente, ta ilustra exactamente loke e compania ta haci. E compania ta spesialisa den ofrece servicionan di comunicacion critico den region; comunicacion via di un ret codifica, propio y bon vigila. Personanan cu ta traha pa companianan den e sector di seguridad publico, tin necesidad na radio, telefon y “tablet” ku ta funciona tur momento. Sigur bao di condishonnan urgente, caminda bida di hende por ta na riesgo of asta na momento di calamidad. C3 ta para pa confiabilidad, continuashon, servicio i liheresa.

C3 tin mas cu 80 aña cu e ta e compania cu ta ofrece e servicio importante aki na Aruba, Curacao, St. Maarten, islanan BES y Anguilla. Originalmente esaki tabata bou di e nomber di “Radio Holland” y despues bou di e nomber Zenitel/ Chuchubi. Clientenan importante y di semper ta ambulans, kustwacht,  marina y sector priva. E compania, aun mas cu antes, lo bay dedica su mes na ofrece tur solucion di comunicacion cu e sorto di organisacionnan ta busca. Banda di esey como innovador, C3 lo sigui e desaroyonan nobo den e ramo di comunicacion.