Avion B767 cu a bati alarma, a aterisa na Aruba sin problema

ORANJESTAD - E avion di carga di 'ABSA Cargo' procedente di Brazil y en ruta pa Miami, a aterisa sin problema na aeropuerto di Aruba diadomingo atardi algo despues di 6'or. Un ora y mei prome, capitan di e B 767 a bati alarma grandi, indicando cu e tin un motor trahando y cu e lo aterisa na Aruba. Mesora preparacion a cuminsa pa cera aeropuerto como parti di e proceso ora di bati alarma grandi. Polis a cera tur caminda pa aeropuerto y a cuminsa cu e preparacion. Despues a bira conoci cu e avion lo mester a 'deshaci' di gasolin pa un ora largo pa evita posibel mas problema ora di aterisahe. A dicidi e ora cu ta bolbe habri caminda, saca tur otro avion. Ora cu e avion tabata falta 15 minuut pa baha, a bolbe cera tur caminda pa aeropeurto. Mirando cu e tabata un ora popular pa cana banda di Linear Park, polis mester a haci un yamada pa tur auto move mesora di e parke, locual tur a haci tambe. Despues di un rato, e avion a aterisa sin problema, riba un solo motor, y a parkeer na posicion 9A, banda di e cargo building. Danki Dios nada no a pasa y e avion y 4 pasahero abordo a aterisa sin problema. Fotonan di www.noticiacla.com