Cuerpo policial a celebra Korpsdag na Scol di polis

ORANJESTAD - Polisnan di Aruba diabierna a celebra e di 28 Korpsdag anual na Scol pa Polis unda cu tur miembro di e famia grandi di Cuerpo Policial, incluyendo pensionadonan, personal civil y studiantenan a disfruta di un sirbishi di misa ecomenico y un koffiemorgen hopi anima. Un parti grandi di e celebracion a wordo dedica na e ceremonia di huramentacion di miembronan di Cuerpo Policial nobo y presentacion di diploma na Polisnan cu a gradua di un opleiding. A combina graduacion di cursonan di diferente nivel, incluyendo e nivel mas halto ofreci na Scol pa Polis actualmente, esta e “kaderopleiding”.

Director di Academia Policial, Drs. Jeannette Richardson-Baars a expresa cu Scol pa Polis ta hopi orguyoso di a por a organisa e evento aki y ricibi asina hopi bishitante pa e celebracion di Korpsdag. Faltando solamente un evento mas pa cera Siman di Polis, cual ta tuma luga diasabra, Richardson-Baars a splica cu alumnonan y e team di Scol pa Polis a participa na e diferente actividadnan cu ta tumando luga for di dialuna y cu nan ta orguyoso di por bisa cu nan a resulta e campeonnan di e torneo di Mens-Erger-Je-Niet. Richardson-Baars a splica cu tanten cu Cuerpo Policial di Aruba ta celebrando e siman aki su di 28 aniversario, Scol pa Polis riba diasabra dia 16 di augustus ta celebrando su di 39 aña. Tabata na aña 1975, ora cu e minister di husticia di e tempo ey, sr. Watty Vos (dfm) a percura pa Aruba haya su propio Scol pa Polis, cu a habri riba e dia di Vos su fecha di nacemento y a dicidi despues pa celebra Dia di Polis riba e fecha aki.

Comisario Trudy Hassell cu orguyo a subraya, “Nos team dia pa dia ta birando mas grandi, nos famia ta birando mas grandi y mi ta kere pa cu esaki Aruba por ta orguyoso cu e tin un Cuerpo Policial di hendenan hoben, hendenan entusiasma, hendenan cu kier sigui Aruba padilanti!” El a felicita tur e Polisnan cu a ricibi nan diploma, añadiendo cu esaki ta un dia hopi grandi pa nan,  nan famia y amigonan y un logro hopi grandi pa na mes y pais Aruba. Na final Comisario Trudy Hassell a felicita tur Polis riba e dia special aki y a invita comunidad di Aruba pa bin y apoya nan ekipo preferi durante e torneo di softball organisa riba diasabra pa cera e gran Siman di Polis 2014. El a felicita tur colega pa cu Korpsdag y a bisa di ta spera cu e eventonan sigui crece tur aña.