Nunca a otorga tereno di 42.000 m2 na Seroe Colorado

ORANJESTAD - E acusacion di tereno pa e.o. famia Arends di p.e. 42.000 m2 na Seroe Colorado nunca no a materialisa. Asina minister di infrastructura Benny Sevinger a sigura Parlamento diabierna atardi. E reunion publico riba asunto di maneho di tereno a converti su mes den un bay bin di atake entre e minister y esnan cu tabata haci pregunta. Continuo interupcion pa 'punto di orden' y e minister su intencion di contra ataca cada 'acusacion' a pone cu e reunion tabata bay hopi lento y problematico. Cada bes presidente di Parlamento Marisol Lopez Tromp mester a interumpi e proceso di contesta pregunta, pa un punto di orden, of hala atencion di e mandatario pa e contesta preguntanan al caso. 

MANDAMENTO DI EMAIL 

E mandatario tabata contesta preguntanan di cada parlamentario y cada uno tabatin un motibo di su actuacion. Riba e asunto di mandamento di mail pa damanan hoben, e mandatario a sigura cu e no sa mes con pa manda email. "Nan a traha un email pami pero mi mes no sa e password" Sevinger a sigura Parlamento. Aki e mandatario ta refuta cu e mes tabata manda email pa clientenan pa asuntonan di tereno. 

NUNCA A OTORGA TERENO SEROE COLORADO 

Pa loke ta e asunto di tereno na Seroe Colorado, e mandatario a confirma cu ruman di Leoncita Arends a haci peticion pa un tereno di 42.000m2 pa 1,2 miyon florin, pero cu nunca e tereno aki a wordo otorga pasobra e persona en cuestion no por a cumpli cu e rekisitonan pa e haya e opcion pa e tereno. E mandatario a mustra cu ora cu un hende pidi pa desaroya algo na e area ey di Aruba, y sigur local, e no ta bay nenga esaki. Pero unabez cu e persona ta interesa, e mester cumpli cu e rekisitonan. Y aki ta unda cu tur hende ta faya. Y den e caso aki, mientras cu enberdad e persona aki a haci e peticion, nunca e no a haya e tereno, segun e mandatario a bisa. 

ATAKA ESUN CU TA HACI E PREGUNTA

Despues e mandatario a coy un practica y tactica di ataca esun cu ta haci e pregunta, door di atake y bolter e caso den su contra. Por ehempel, contra parlamentarionan Adi Thijsen y Evelyn Wever Croes, e mandatario a usa ehempelnan cu nan tabata envolvi aden pa loke ta asunto di tereno. Asina desviando e atencion pa esnan cu tabata haci e pregunta, y culpa nan di practica igual of similar, pa mustra cu prome cu e parlamentarionan keha y haci pregunta, nan mester wak den nan mesun cura, kico ta kico. 

Constantemente e presidente di Parlamento a mustra e mandatario cu e lista di orador tabata largo y cu e practica ey no ta yuda e causa y cu mester mantene na e proceso di contesta pregunta y nada mas. E mandatario no a gusta esaki y a continua su tactica, indicando cu asina e mester a mustra cu e loke e tabata wordo acusa di dje, no tabata malo. 

Pa loke ta e e falta di casnan, e mandatario a considera esaki personalmente como un 'berguensa' mirando cu pa motibo di e ROP actual, e no por cumpli cu otorgamento di 1000 tereno pa aña, y den un periodo di 7 pa 8 aña, gobierno a logra otorga apenas 800 tereno, cu e mes ta considera como un berguensa. E intencion ta pa busca terenonan aki aya cu ta habri, y asina purba ainda pa den e proximo 2 añanan, ainda logra otorga por lo menos 1000 tereno, 500 pa aña.