Fiscal a pidi 18 aña di prison pa 'Yellow' y 2 aña pa complice

ORANJESTAD - Fiscal a pidi 18 aña pa e sospechoso Trenidad (T), conoci como "Yellow", acusa di a asesina e victima D, y intento di asesinato di e otro victima A.M. E caso a keda trata diabierna den corte, bou di vigilancia pisa di autoridad policial. Den e caso aki, fiscal ta haya cu e sospechoso T. ta culpabel di homicidio di e victima D. y intento di homicidio di e otro victima di fam A.M. 

E SUCESO

Fiscal a considera cu T. a tira cu un arma di candela, a consecuencia di cual D. a fayece y A.M. a resulta herida di tal gravedad, cu e lo keda handicapt pa resto di su bida. Ta trata di hechonan castigabel muy grave y dos bida di hende. Fiscal a mustra cu famia di e victima mortal y di A.M. ta kibra y nan tristesa ta enorme. Nan bida lo keda marca pa semper. Loke a sucede, a shock comunidad profundamente y a lanta sentimentonan di inseguridad. E por a hasta daña turismo, mirando cu Olde Molen, unda e tiroteo a sucede, ta riba e hotelstrip. Segun Fiscal, T. tin cu djis trata di imagina su mes con e lo sinti si su ruman wordo tira mata. 

SCONDE PA ACTO

Pa colmo, a dura casi dos luna prome cu T. a wordo deteni, loke pa fiscal ta mustra ki tipo di persona T. ta, cu prome ta tira hende cu arma di candela y despues ta sconde. Tabata un periodo hopi pisa pa Polis y Ministerio Publico. Esaki ta un caso cu a traha non-stop riba dje.  

CARGO CONTRA RvdB

Contra e otro sospechoso R.v.d.B., fiscal a exigi 2 aña pa posesion di un arma di candela. Hues a tuma su tempo pa scucha e dos sospechosonan. Nan no a bisa mucho, mas tanto “Si” y “No” y “Nan ta gaña” y “Mi no sa” y “Nan ta papia coy loco”. T. a declara na inicio cu e no a haci'e intencionalmente. Segun e, e bouncernan di Olde Molen a bringa cu ne y nan a tire abou. E arma di candela di un di e bouncernan a sali cay y el a coge y tira cu ne den layra. E no a ripara cu hende lo a wordo raca. Djey el a zwaai e arma bent'e y bay for di e sitio. Cualkier otro declaracion di e bouncernan y e testigonan, ta mentira, segun e. For di e curpa di e victima cu a fayece a saca dos bala y e tabatin tiro na su pecho y lomba.  

Polis a scucha e cuatro bouncernan cu tabata na e sitio y na januari a tuma declaracion tambe di e victima A.M. Tabata net prome cu A.M. a wordo transporta pa Colombia. E no tabata por a papia, pero si move su lipnan y asina el a comunica cu recherche. El a declara cu T. a tira riba dje, pasobra nan como bouncer a stop un pelea. 

DECLARACION DI BOUNCERS

Tur e bouncernan a declara den e mesun liñea, cada uno for di su angulo. Basicamente nan ta bisa cu T. y su gang tabata bringa cu dos Colombiano y cu nan a kibra e pelea. A sigui discusion y T. a haya mokete di sigur un bouncer. Prome cu el a bay pa un auto cu tabata para mas leu, un di e bouncernan a scuch'e bisa e victima A.M.: “Yo vengo por ti” y “Bo ta bay ****”. Unabes na e auto, segun declaracion di dos di e bouncernan, a surgi manera un lucha cu un homber cu cabey largo (cu Polis a reconoce riba video di seguridad despues como e sospechoso V.d.B.). Un di e bouncernan a wak e ta discuti cu e homber aki, un otro a wak cu e homber no kier a dune “algo” y cu tabatin un lucha. Finalmente e homber a dun'e “algo” y el a cana bin dobla stret den direccion di e bouncernan. Un di e bouncernan a bisa e otronan pa tene cuidou, pasobra e tin “algo”. E ora el a saca e arma y a los tres tiro riba A.M. E victima a cay sinta y djey un tiro mas, y el a cay drumi. D. a bay riba T. y a bula sinta riba dje pa purba kita e arma for di dje. E ora T. a los dos tiro riba dje. E sospechoso V.d.B. a bisa cu e no tabata ey mes, aunque cu hues a mustr'e video riba cual un persona cu parce masha hopi mes ta visibel. Pa T, a pidi 18 aña di prison, y pa vdB a pidi 2 aña. Hues a cera e caso y ta dicta sentencia dia 30 di september.