Partidonan politico afecta pa voto riba amienda union civil

ORANJESTAD - E resultado di voto di diahuebs anochi den Parlamento pa e amienda riba 'union civil' ta bay mucho mas leu cu djies un voto. E comentarionan riba rednan social, na radio y medionan di comunicacion a duna un indicacion cu e votonan a 'dividi' e partidonan grandi y cu nan tin cu bay wak con ta 'drecha' e situacion awor. E resultado di voto tabata 11 voto pro, y 5 contra. Esey, siendo cu tabatin mas parlamentario presente durante curso di e dia. Y e analisis ta haci'e aun mas interesante. 

VOTAMENTO

Mientras cu fraccion di AVP tabata practicamente completo (11) (faltando 1 parlamentario) tabatin solamente 6 cu a vota pro, y 5 a vota contra. Esnan cu a vota pro tabata Mervin Wyatt Ras, Chris Dammers, Norman Roos, Jeffrey Kelly, Desiree de Sousa Croes, Rene Herde. Arends Reyes den un carta, a mustra su sosten pa e amienda, pero no ta conta pasobra no a vota 'fisicamente'. Fraccion di oposicion MEP tabatin 7 miembro di cual solamente 3 a vota pro, y e resto a bandona sala pa no vota. Esnan di MEP cu a vota pro tabata e lider Evelyn Wever Croes, Glenbert Croes y Chris Romero. Esnan cu a bandona sala tabata Guilfred Besaril, Xiomara Ruiz Maduro, Adi Thijsen y Dangui Oduber. Pa fraccion di PDR Andin Bikker a vota pro, y e fraccion independiente di Marisol Lopez Tromp tambe a vota na fabor. 

CRISIS DEN PARTIDONAN?

Ningun di dos partido kier papia di crisis den partido pa motibo di e votamento. Fraccion di AVP ta yame (y semper a yam'e) un muestra di democracia bibo den e partido. Desiree de Sousa ta afirma na NoticiaCla.com sinembargo, cu e loke a sosode, ta haci hopi daño y cu tin cu bay traha riba e asunto aki pa wak si por remedia e situacion. Lider di partido MEP Evelyn Wever a sigura NoticiaCla.com cu su consenshi ta limpi, su fraccion tabatin consensus pa e voto, y cu nan a haci e miho posibel. Loke e ta lamenta, ta e hecho cu pa motibo di falta di tempo y informacion, awe mainta hopi hende di e partido a lanta tristo, bruha y confundi, y ta kere cu e partido a laga nan na caya. Wever a sigura NoticiaCla.com cu awor su trabou ta bay ta pa informa su 'base' y tur otro di partido di e consecuencia di e voto y e berdad y pa nan keda trankil. Berdad, cu tin un pensamento den partido cu MEP a laga nan na caya, pero e tin e conviccion cu despues di e splicacion, e siguidornan di MEP lo sa di compronde kico a sosode y pakico tal desicion a wordo tuma. Segun Wever, e acto di ayera a cera e porta pa matrimonio di mesun sexo y ta evita cu den futuro un hues por habri e porta ey. "Nos voto a percura pa e porta ey keda cera" Wever a sigui bisa.