De Sousa: Contento cu resultado, desapunta den algun colega

ORANJESTAD - "Mi ta super super happy" tabata e prome palabranan di parlamentario Desiree de Sousa Croes na NoticiaCla.com diahuebs anochi, despues cu Parlamento cu un mayoria minimo a aproba e amienda riba union civil. Aunke e no tabata esun cu e tabata kier, e ta satisfecho cu por lo menos nan tin algo awo. "E ta un logro. E ta un prome stap" e parlamentario a bisa, indicando cu tin cu haci hopi cos ainda pa logra igualdad completo. Ela keda desapunta si den algun colega di partido cu a vota contra "E tabata hurtfull. Bo no ta lubida nunca loke bo amigonan ta haci bo. Mi a hay'e fastioso. E tabata ofensivo" de Sousa a sigui bisa. 

REFERENDUM

E hecho cu algun colega di partido a opta pa bay un referendum, no a cay den bon tera serca e parlamentario. "Hendenan cu ta pensa cu derecho humano bo tin cu busca referendum p'e, esey dado momento a ponemi bira onsportief", de Sousa a sigui bisa. "Mi no ta kere cu esey ta e manera pa bo trata derecho humano. Esey bo ta duna". Los di esey, de Sousa ta hopi contento cu e logro y cu e amienda a pasa, y e reaccion di esnan cu tabata presente. "Nos a logra algo bunita". 

RESISTENCIA DI PROPIO PARTIDO

Un total di 5 miembro di su propio fraccion a vota contra e amienda, cu no a bin completamente como sorpresa. No obstante esey, ela haci dolo segun e parlamentario. Y esey definitivamente a afecta e relacion den partido. "Nos tin cu bay traha riba dje" e parlamentario a bisa, refiriendo na e coleganan cu no a sostene den partido. "E tabata hurtfull. Nan ta bisa berdad, bo no ta lubida nunca locual bo amigonan ta haci bo. Ami a hay'e fastioso. E tabata ofensivo. Tin cosnan cu a wordo bisa cu ta innecesario" de Sousa a sigui bisa, indicando tambe cu e partido a bay campaña unda cu ta para pa igualdad. "Bo no tin cu bay piki kico ta igualdad. Esey mi ta haya hopi jammer. Mi ta haya hopi straño cu nan ta vota contra amienda pero pro (pa) e ley. Esey kier men cu nan a vota pa tur e amiendanan hunto" de Sousa a bisa. "Mi no ta comparti nan opinion, mi ta haya hopi fastioso e comentarionan. Bo ta ofende un grupo grandi di hende pa bo complace porta un grupo segun bo". Mes momento el a mustra cu e ta 'enormemente' agradecido na e coleganan cu si a vota pro. 

PROPIO MOCION RECHASA

E propio mocion cu de Sousa a entrega pa 'speed up' e proceso pa tur e leynan di ayera drenta na vigor prome cu fin di aña ainda mes, a keda rechasa. "Esey ta bisami cu un grupo di hende ta pensa cu no mester haci'e asina lihe". Pero de Sousa a splica NoticiaCla.com si, cu no obstante esey, e tin 'toezegging' cu e lo bay haci'e toch den 3 luna. E parti cu no a wordo acepta, de Sousa tin confiansa cu proximo biaha cu habri e BW atrobe (Codigo Civil), lo por incluy'e den dje. Ta trata di mas of menos 20% di e amienda original cu mester a wordo cambia pa e por a haya e sosten. 

RETIRO TA SIGUI OF NO

E desicion di e parlamentario pa retira otro aña, ta keda vigente. No obstante e hecho cu ela bisa cu e ta retira pero cu e votamento por tin efecto, de Sousa a bisa cu e no ta kere cu e ta bay cambia su pensamento, aunke cu e votamento di ayera nochi ta pone cu e mester bay pens'e toch un rato. Pero asina mes, e ta duna indicacion cu e plan ta keda pa retira, y pa e embarka den retonan nobo su dilanti.