'Yellow' lo presenta den corte diabierna pa caso Olde Molen

ORANJESTAD - Diabierna mainta corte ta trata e caso di e asesinato di un bouncer na december ultimo na e club Olde Molen. E acusado principal Trenidad lo mester presenta dilanti mesa berde pa responsabilisa su mes pa su actonan. Trenidad ta wordo acusa di a intencionalmente tuma bida di un persona riba 7 di december 2015, dor di intencionalmente tir'e un of mas biaha cu revolver den su pecho y/of lomba. E ta wordo acusa di tabatin e intencion di tuma bida di un otro persona riba e mes fecha, dor di tir'e un of mas biaha cu revolver den nek of garganta. 

Mientratanto, e otro persona V.d.B. ta wordo acusa di a intencionalmente tuma bida di un of dos persona riba 7 di december 2015, dor di yuda Trenidad. dor di dun'e e revolver y/of bala. V.d.B. ta wordo acusa di posesion di un revolver of pistool of bala riba 7 di december 2015. E caso ta programa pa cuminsa 8:30 am y ta premira cu lo tin basta seguridad pa e caso aki.