Dos siman mas pa conoce futuro final di Bushiri hotel

ORANJESTAD – Prome cu mei anochi 30 di augustus proximo, gobierno lo por cuminsa e proceso pa recobra e garantia di 3.5 miyon florin di Southwest Group, pa incumplimento di e acuerdo pa desaroya e hotel Bushiri. “Mi no por sconde mi desapunto pa no a keda cla prome cu dia 30 di augustus, pero mi ta keda positivo”. Asina Minister Otmar Oduber a comparti y admiti su sentimento pa cu e proyecto menciona. E tin tur speransa cu nan (Southwest Development Group) lo keda cla, pero ta sigura cu si no logra esaki, lo para tur cos y converti e loke ta un ruina awo den un area di beach publico.

Faltando apenas dos siman pa haya e contesta, e mandatario ta prepara pa tur dos scenario. E tabata firme tambe indicando cu a no ta otorga mas extension, cu ta cuadra cu e condicion di e banco financiado, Aruba Investment Bank, cu tambe a mustra cu nan no ta extende e garantia miyonario despues di 30 di augustus. Como parti di e mocion den parlamento algun tempo pasa, ta keda e ora pa sera e proceso y prepara e tereno pa e bira un beach publico, y no ta duna un otro compania e posibilidad mas. E proceso ey di converti e propiedad actual den e beach, lo por tuma su 4 pa 5 luna, cu ta pone cu den di dos cuartal di 2015, Aruba lo por haya un beach acerca, si e grupo no logra keda cla.

E grupo Southwest Development ta bira e ultimo grupo cu a haya e chens, despues cu dos otro grupo den pasado tambe a purba. Uno tabata durante e gabinete anterior Oduber, y despues un di dos di e mesun lista, cu gobierno actual a purba. Pero esey tampoco no a logra cu a pone cu a bay otro destaho. Na mei di 2012, e grupo Southwest Development (grupo local) a gana e bid y for di e tempo ey, 1 aña y 7 luna, nan ta den e proceso cu varios biaha a haya un ‘extension’. E biaha aki esey no ta sigui y e D-day di Bushiri ta yegando. . E mandatario a confirma cu aki dos siman ta haya tende si e grupo menciona ta logra keda cla cu su asuntonan financiero pa por sigura cu nan mes ta keda cu e hotel aki. Foto Bushiri cortesia Caribisch Netwerk